A policía segue á procura dos autores do ataque ás portas da institución benéfica Padre Rubinos da Coruña

A Policía Nacional segue á procura dos autores da pelexa rexistrada fronte á institución benéfica Padre Rubinos da Coruña, este mércores, sobre as oito e media da tarde.

"Parece ser que foi un axuste de contas, porque estaban aí os ocupantes ilegais da Ronda de Nelle. Son colectivos que se enfrontan por calquera circunstancia", di Flori Estévez, presidenta da asociación de veciños de Labañou, Riazor e Cidade Xardín.

Segundo puido saber o Galicia Noticias, no ataque participaron dous grupos, un de orixe alxeriana e outro marroquí. Na lea, que se saldou cun home inconsciente, a causa dos golpes, e tendido na rúa, empregaron paus.

"Levárono nunha ambulancia. Levaba un golpe na cabeza ou nas costas. Pero viñan xa desde pola mañá, que estaban no parque e, ao final da tarde, enfrontáronse", engade Flori Estévez.

No barrio de Labañou, nin veciños nin comerciantes queren falar. Teñen medo porque din que as agresións son frecuentes.

"Todos os veciños están con moito medo, sobre todo, a xente maior. E non hai policía nin vixilancia", conclúe a presidenta da asociación de veciños.

O agredido permanece ingresado no CHUAC. Está en planta, recuperándose das feridas que sufriu na cabeza e en distintas partes do corpo. A súa evolución é favorable.