A CPI emite ordes de arresto contra Netanyahu e Gallant por crimes de guerra en Gaza

A Corte Penal Internacional (CPI) ditou este xoves ordes de detención contra o primeiro ministro israelí, Benjamin Nentayahu, e o seu exministro de Defensa Yoav Gallant, como máximos responsables da comisión de crimes de guerra e lesa humanidade na Franxa de Gaza polo menos desde o 8 de outubro do ano pasado.

Os xuíces tamén aprobaron a orde de arresto de Mohammed Deif, un alto cargo de Hamas considerado xefe da súa ala militar, aínda que Israel xa o declarou morto nun ataque israelí lanzado o pasado xuño contra a Franxa, un falecemento que nunca foi confirmado polo grupo islamita.

Con isto, a Sala de Cuestións Preliminares rexeitou por unanimidade as impugnacións presentadas en setembro por Israel, que negaba a xurisdición da CPI sobre a situación no Estado de Palestina en xeral, e sobre os cidadáns israelís en particular.

O Goberno israelí tamén esixira aos xuíces que detiveran “calquera procedemento relacionado coa situación, incluíndo a consideración das solicitudes de ordes de arresto”, outra petición rexeitada polos maxistrados.

“Non é necesario que Israel acepte a xurisdición da Corte, xa que esta pode exercer a súa xurisdición sobre a base da xurisdición territorial de Palestina, como se determinou anteriormente”, advertiu a Sala.

Considerou ademais que os Estados “non poden impugnar a xurisdición da Corte antes da emisión dunha orde de arresto, polo que a impugnación de Israel é prematura”, dixo. Neste sentido, os xuíces aprobaron as ordes de arresto solicitadas o pasado 20 de maio polo fiscal contra Nentayahu e Gallant como “responsables penalmente como coautores dos crimes de guerra de uso da fame como método de guerra e os crimes de lesa humanidade de asasinato, persecución e outros actos inhumanos”.

Ademais, tamén se lles considera responsables como "superiores civís polo crime de guerra de dirixir de forma intencionada ataques contra a poboación civil" na Franxa de Gaza.

"A Sala concluíu que ambos privaron intencionadamente a poboación civil de Gaza de bens indispensables para a súa supervivencia, incluídos alimentos, auga, medicinas, combustible e electricidade, entre outubro de 2023 e maio de 2024. Este bloqueo tivo graves consecuencias, incluída a morte de civís, incluídos nenos, debido á desnutrición e a deshidratación”, engadiu a CPI.

No caso do Movemento de Resistencia Islámica (Hamas), Khan pedira o arresto dos entón líder de Hamas, Yahya Sinwar; o xefe da ala militar, Mohammed Deif, e o seu buró político, Ismail Haniyeh.

A acusación inclúe seis crimes de guerra, como a toma de reféns e actos de violencia sexual, e cinco de lesa humanidade, incluídos exterminio e asasinatos. Con todo, e desde que o fiscal solicitou o seu arresto, Haniyeh morreu nun ataque en Teherán en xullo e o seu herdeiro, Sinwar, correu o mesmo destino noutro de Israel en Gaza o mes pasado, polo que Khan retirou a súa solicitude ao considerar confirmado o seu falecemento.

Con respecto a Deif, a Fiscalía indicou que continuaría solicitando información sobre "a súa suposta morte". "O 15 de novembro de 2024, a Fiscalía, baseándose en información das autoridades israelís e palestinas, informou a Sala de que non pode determinar se Deif faleceu ou segue vivo. Polo tanto, a Sala emite a presente orde de arresto", sinalaron os xuíces.

Reaccións de Netanyahu e Hamas

A resposta de Benjamín Netanyahu sobre a orde de arresto que recaeu sobre el foi afirmar que "non hai nada máis xusto que a guerra que Israel libra en Gaza" e afirmou que "ningunha resolución antiisraelí impedirá que o Estado de Israel protexa os seus cidadáns".

"A decisión antisemita da CPI equivale ao moderno xuízo a Dreyfus, e tamén terminará así", indicou o primeiro ministro en alusión á sentenza xudicial en Francia contra o capitán Alfred Dreyfus en 1898, cuestionada por amplos sectores da sociedade da época por antisemitismo. O primeiro ministro acusou a corte da Haia de ser un "organismo político parcial e discriminatorio" e tachou a acusación contra el de "absurda e falsa".

Por outra banda, Hamas, a organización que goberna en Gaza, celebrou a decisión: "A xustiza internacional está connosco contra a entidade sionista", aseverou a organización nun comunicado.

O membro do brazo político da organización, Izzat al Rishq, asegurou que esta decisión da CPI expón "o verdadeiro rostro terrorista" de Israel en beneficio dos palestinos, así como que a súa causa e obxectivo de liberación "son inevitables".

"O Estado ocupante enfróntase á verdade, contradí o concepto de xustiza e choca cos valores humanos", sentenciou Al Rishq.

"Facemos un chamamento á CPI para facerlle render contas a todos os líderes criminais da ocupación, os seus ministros e oficiais", dixo a organización.

Por último, Hamas chamou a todos os países do mundo para cooperar coa Corte para axuizar a ambos os dous políticos israelís e traballar para poñer fin á ofensiva en Gaza.

Os Estados Unidos rexeitan as ordes de arresto

 Estados Unidos rexeitou este xoves a decisión da Corte Penal Internacional (CPI) de emitir ordes de arresto contra o primeiro ministro israelí, Benjamín Netanyahu, e o seu exministro de Defensa, Yoav Gallant, por crimes de guerra e de lesa humanidade na Franxa de Gaza.

"Estados Unidos rexeita fundamentalmente a decisión da Corte de emitir ordes de arresto contra altos funcionarios israelís", dixo a EFE un portavoz da Casa Branca, que explicou que Washington está a se coordinar cos seus aliados, incluído Israel, sobre os "próximos pasos" a tomar.

O portavoz sinalou que Estados Unidos está "profundamente preocupado" pola "precipitación" da Fiscalía da CPI, liderada por Karim Khan, para solicitar as ordes de arresto, así como polos "erros procesuais problemáticos que levaron a esta decisión".

"Estados Unidos deixou claro que a CPI non ten xurisdición sobre este asunto", subliñou o portavoz.