A Festa da Lamprea de Arbo xa é de Interese Turístico Internacional

O BOE publica este xoves que a Festa da Lamprea de Arbo, que se celebra nesta localidade pontevedresa desde 1961, é xa Festa de Interese Turístico Internacional. Este recoñecemento únese ao conseguido en 2005, cando foi declarada Festa de Interese Turístico de Galicia, e ao de 2016, declarada entón Festa de Interese Turístico Nacional.

A Festa da Lamprea ten lugar a finais de abril, e este ano, que tería lugar os días 28, 29 e 30, celebrarase xa baixo a súa nova denominación de Festa de Interese Turístico Internacional. Turismo de Galicia enviou este ano a á Secretaría de Estado de Turismo a documentación achegada polo Concello de Arbo, como entidade promotora da solicitude, e o expediente administrativo con informe favorable para a declaración desta festa co distintivo de interese internacional.

Este informe recolle que o evento cumpre os requisitos preceptivos para que sexa valorada pola Secretaría de Estado de Turismo, organismo competente para formalizar esta distinción, como así sucedeu.

A Festa da Lamprea xurdiu hai agora 62 anos, cando os propietarios de diferentes restaurantes e adegas da localidade apostaron por organizar un evento que servise para promocionar este distintivo produto gastronómico xunto ao viño albariño da zona.

Capturada de modo artesanal no río Miño, a lamprea xa se enviaba en tempos dos romanos a Roma, e Arbo é actualmente o lugar que escollen todos os amantes do forte sabor desta especie para degustala. EFE