A montaña de Lugo e Ourense terá servizo de biblioteca móbil
A montaña de Lugo e Ourense terá servizo de biblioteca móbil
As furgotecas percorrerán unha vintena de concellos dous días ao mes
A furgoteca, o novo servizo de bibliotecas móbiles da Xunta, comezará a funcionar dous días ao mes en vinte concellos das provincias de Lugo e Ourense.
A finais de febreiro botarán a andar os dous vehículos de cor azul que foron adaptados para levar aos concellos de ambas as provincias libros, películas, música, xogos, revistas e xornais, entre outros servizos culturais.
O titular de Cultura da Xunta, Román Rodríguez, presentou o novo servizo este martes nun acto celebrado na Cidade da Cultura.
Un dos días, as furgotecas situaranse nos lugares de maior afluencia de público, onde se celebran feiras e mercados e hai centros de saúde, residencias, pavillóns de deportes ou centros socio-culturais.
O segundo día, a idea é que a biblioteca móbil realice un percorrido polos núcleos e aldeas para ofrecer un servizo máis personalizado aos usuarios.
Na provincia de Lugo acudirán a Baleira, Cervantes, Folgoso do Courel, O Incio, Navia de Suarna, Negueira de Muñiz, As Nogais, Pedrafita do Cebreiro, Samos e Triacastela, e na de Ourense, irá a Baltar, Os Blancos, Calvos de Randín, Castrelo do Val, Cualedro, A Gudiña, Laza, Oímbra, Trasmiras e Vilardevós.
A colección inicial da que dispoñerán os vehículos nace con 500 exemplares de libros, pero tamén películas, música ou xogos físicos e dixitais, así como publicacións periódicas como revistas e xornais.
Esta iniciativa virá acompañada doutras actividades culturais, de forma que se estableza unha programación de periodicidade estable que inclúa clubs de lectura, contacontos ou encontros con autores locais.
