A raíña Sofía evoluciona favorablemente da infección urinaria que a mantén hospitalizada

A raíña Sofía pasou a súa segunda noite na clínica Ruber Internacional. A súa evolución está sendo "rápida e favorable", segundo a Zarzuela, pero permanece en observación pola infección de tracto urinario que lle foi diagnosticada.

Onte recibía as visitas da infanta Helena e do rei Filipe, que á saída do centro hospitalario aseguraba que a súa nai está "animada, moi ben, e con ganas de volver o antes posible". Os reis manteñen a súa axenda prevista, e esta mañá viaxaron a Gran Canaria para entregar os Premios Nacionais de Innovación e Deseño, pendentes da posible alta da raíña Sofía.

Foi a noite do martes, tras asistir ao funeral do seu sobriño Fernando Gómez-Acebo, cando dona Sofía tivo que ser ingresada, segundo o comunicado da Casa Real. Aos seus 85 anos, a raíña goza de boa saúde e só estivo hospitalizada en tres ocasións, con motivo do nacemento dos seus fillos. Mantén unha activa axenda pública con actos de representación da Coroa, especialmente relacionados coa cultura e as entidades benéficas. Este venres tiña previsto visitar o Banco de Alimentos de Huesca, un compromiso que xa foi anulado. Nos últimos días dona Sofía participou en varias celebracións da Semana Santa, e o sábado asistiu á voda do alcalde de Madrid, onde coincidiu con don Xoán Carlos, que o luns regresou a Abu Dhabi.