A terceira xornada de folga en Iberia comeza con normalidade en Galicia

Terceira xornada de folga dos traballadores do servizo de asistencia en terra de Iberia. No aeroporto Rosalía de Castro, en Santiago, a xornada comezaba con normalidade.

"Todo ben, saímos á hora, pero a verdade é que me cambiaron dúas veces o voo, a priori ía chegar onte, ao final chegamos hoxe, pero puidemos cambiar ben e sen problema. Eu tiña a posibilidade de cambialo, outras persoas seguramente non tiñan esa posibilidade".

"Non tivemos ningún problema, estiven vendo o panel de voos e non había ningún atraso".

Con motivo da folga, Iberia cancelou para este domingo 11 voos entre Galicia e Madrid, en plena operación retorno. 

"Non tiven ningún problema, non me afectou a folga de Iberia así que bastante ben", "nós non facturamos maletas, había máis problemas na facturación", comentaban.

Segundo datos de Aena, entre as chegadas e as saídas, para este domingo estaban previstos algo máis dun cento de voos nos tres aeroportos galegos. Vinte e oito na Coruña, 64 voos en Compostela, e 22 en Vigo. Remataron as vacacións de Nadal e chega agora a volta á rutina.

"Vai ser dura, vai ser complicada, hai que cumprir coas obrigas do traballo".

"Hai gañas de volver tamén á casa un pouco".

"É a volta ao traballo, á gardería..., pero con gañas tamén".