A UE e Mercosur acordan crear a maior área de libre comercio do mundo

Cun tímido apertón de mans, os presidentes da Comisión Europea e de 4 dos 5 estados que forman Mercosur simbolizaban a fin de case 25 anos de negociacións. O acordo multiplicará as relacións comerciais nunha área de máis de 700 millóns de consumidores. 

"Non hai solucións máxicas, non hai burócratas nin gobernos que asinen a prosperidade. É unha oportunidade", dicía  Luis Lacalle Pou, presidente de Uruguai.

Do lado europeo, o acordo beneficiará sobre todo ao sector automobilístico, que agora paga aranceis dun 35 por cento, pero tamén a venda de maquinaria ou produtos farmacéuticos.

Só para as empresas europeas, subliñaba Ursula Von der Layen, suporá aforrar 4.000 millóns de euros en aranceis, burocracia e acceso preferencial a materias primas. E reducirá a dependencia da China e o impacto das previsibles novas barreiras que prepara a administración Trump.

"Non só é unha oportunidade económica, tamén unha necesidade política", dicía a presidenta da Comisión.

Von der Leyen dirixíase tamén aos agricultores europeos, preocupados polo impacto da entrada de carne, pensos ou produtos agrícolas con estándares laborais e sanitarios máis baixos. "O acordo inclúe cláusulas robustas", dixo Von der Leyen, "para protexer o voso sustento".

As organizacións agrarias europeas xa convocaron unha protesta para o vindeiro luns en Bruxelas polo impacto do que temen sexa unha competencia desleal.

Os Gobernos de Francia e Italia xa dixeron que non van ratificar o acordo na súa redacción actual, o que anticipa unha dura negociación interna entre os 27 antes de que entre en vigor.

Valoración do sector agrario español

O sector agrario español lamentou de forma unánime o acordo entre Mercosur e a Unión Europea (UE), xa que senten como "os grandes prexudicados" dun convenio de libre comercio no que, ao seu xuízo, foron utilizados como "moeda de cambio", sen contar cos seus intereses.

O presidente da Asociación Agraria de Novos Agricultores (Asaja), Pedro Barato, reiterou que non poden "aceptar máis acordos no que a agricultura europea sexa a pagá doutros intereses; acordo si, pero non desta forma".

Nesta mesma liña, o presidente da Coordinadora de Organizacións de Agricultores e Gandeiros (COAG), Miguel Padilla, sinalou como "absolutamente indignante" o peche deste acordo do que fixo responsable ao Goberno español, nun momento no que "parecía que se daba un novo rumbo na Unión Europea".

O secretario de relacións internacionais da Unión de Pequenos Agricultores e Gandeiros (UPA), José Manuel Roche, advertiu de que este acordo "pode prexudicar seriamente á agricultura e gandería familiar europea" e a sectores como o vacún, o porcino e o arroz.

Declaracións de Luis Planas

O ministro español de Agricultura, Luis Planas, afirmou este xoves que o acordo comercial entre a Unión Europea (UE) e Mercosur "será un grande éxito" para o club comunitario e o bloque latinoamericano se finalmente logra pecharse.

"Creo que Mercosur é un grande éxito. Se finalmente conseguimos subscribilo, será un grande éxito para a Unión Europea e tamén para os países do Mercosur", declarou tras intervir nunha conferencia do medio especializado Politico en Bruxelas.

Afirmou que será "un grande éxito" en termos comerciais, de exportacións, para Mercosur, "en todos os ámbitos, incluíndo o sector agroalimentario".

"As posibilidades en materia de aceite de oliva, de viño e outros sectores son moi grandes en Mercosur. Eu quero ver esa parte que me parece positiva, tamén no sector, evidentemente, agroalimentario", manifestou. Dixo entender que haxa países como Francia "que se opuxo tradicionalmente a este acordo".