A xuíza deixa en liberdade sen medidas cautelares a secuestradora do bebé de Basurto
A xuíza deixa en liberdade sen medidas cautelares a secuestradora do bebé de Basurto
A decisión da maxistrada coñeceuse a última hora da tarde, despois de que tanto a acusada coma a súa familia pediran o ingreso nun centro psiquiátrico
A muller, de 24 anos, recoñeceu os feitos este sábado na súa declaración no xulgado
Da secuestradora do bebé no hospital de Basurto só hai unhas poucas imaxes captadas polas cámaras e este sábado, naturalmente, preservouse a súa intimidade tendo en conta as circunstancias do caso. Nos últimos meses estivo internada nun hospital psiquiátrico do País Vasco. Hoxe pasou a disposición xudicial e ante a maxistrada confesou que foi nese centro hospitalario onde pensou en facerse cun cativo alleo e difundir entre os familiares a nova de que estaba embarazada.
O seu avogado anunciaba este mediodía, ante o Xulgado de Bilbao, que pediron que siga co tratamento psiquiátrico:
"Recoñeceu os feitos. Pasou recoñecemento forense. Solicitamos o ingreso, tanto a súa familia coma ela mesma querían o ingreso voluntario nun centro psiquiátrico e imos ver o que se acorda".
En principio, a xuíza ía decidir se ingresaba en prisión ou nun psiquiátrico e acabou saltando a sorpresa. Finalmente, optou por deixar en liberdade sen medidas cautelares a secuestradora, Mireia C. S., de 24 anos, malia que esta recoñeceu explicitamente os feitos.
Mentres, os pais do bebé Aimar pasan unha fin de semana xa en familia tentando repoñerse do vivido durante doce horas de terrible pesadelo.
