Administradores de predios de Galicia piden ás comunidades de veciños medidas de aforro de auga
Administradores de predios de Galicia piden ás comunidades de veciños medidas de aforro de auga
As piscinas ou a rega de zonas verdes son dúas das propostas
En comunidades de vivendas con piscina, estas instalacións supoñen un elevado consumo de auga. De aí que a principal medida proposta polo Colexio de Administradores de Fincas de Galicia vaia encamiñada a reducilo.
"É moi importante facer unha posta a punto axeitada. Que o técnico cualificado do mantemento das piscinas as revise, que non haxa filtracións nin fendas, porque por aí é por onde se perde moita auga. Que se empreguen adecuadamente as depuradoras e, se é posible, que se utilicen sistemas de reciclado da auga", detalla Teresa Suárez, vicepresidenta do Colexio Oficial de Administradores de Fincas de Galicia.
Outra medida: evitar o uso de auga potable para a rega en xardíns e zonas verdes. "Non usar auga potable para determinados labores en zonas comúns é importante. Quizais o custo dun sistema para reciclar a auga é elevado, pero acábase recuperando".
Nas súas propostas teñen en conta os anuncios realizados pola Axencia Estatal de Meteoroloxía. E así o aclara Teresa Suárez cando sinala: "A petición vén dada polo anuncio dun verán moi seco en toda España e tamén en Galicia".
Piden actuar con antelación para previr posibles cortes ou racionamentos de auga na época estival.
