Amnistía Internacional teme que a eliminación da sedición acabe criminalizando a protesta pacífica
Amnistía Internacional teme que a eliminación da sedición acabe criminalizando a protesta pacífica
Amnistía Internacional pide "precisión" para evitar que a norma "impoña restricións á liberdade de expresión, reunión e manifestación”
Pide que só se castiguen "actos de violencia e intimidación graves contra as persoas" nas manifestacións
Amnistía Internacional alertou este xoves de que a reforma do Código Penal para eliminar o delito de sedición podería "criminalizar a protesta pacífica" ao substituílo polo de desordes públicas agravadas.
Ao seu xuízo, coa redacción actual, a iniciativa do PSOE e Unidas Podemos podería carrexar "limitacións indebidas ao exercicio do dereito á protesta", polo que pediu aos grupos parlamentarios "precisión" para evitar que a norma "impoña restricións á liberdade de expresión, reunión e manifestación”.
Amnistía reclamou claridade para que quede claro que “só” se castigarán "actos de violencia e intimidación graves contra as persoas" nas manifestacións.
Porque, tal e como está exposta, permitiría castigar como desordes públicas agravadas, non xa alteracións da orde pública reais e efectivas, senón simplemente "a mera posibilidade de poñelo en perigo".
Amnistía queixouse de que a iniciativa legal manteña a tipificación como delito da invasión e ocupación de sedes de empresas ou institucións, pero ademais especifique que eses actos se sancionarán aínda que leven a cabo sen violencia nin intimidación.
É dicir, castigaríanse protestas se producen "unha perturbación relevante da actividade normal" da entidade, un concepto que Amnistía considera ambiguo. Por iso, considera necesario aclarar que é "violencia no contexto de manifestacións" e establecer "un limiar elevado de danos aos bens para considerar o procesamento", co fin de limitalo a "casos graves".
Entre os aspectos positivos da reforma, a organización aplaudiu a eliminación do delito de sedición polo que foron condenados, entre outros, os dirixentes da ANC e Òmnium Cultural, Jordi Sànchez e Jordi Cuixart, respectivamente, o que supuxo "unha restrición desproporcionada dos seus dereitos á liberdade de expresión e reunión pacífica".
Tamén aplaudiu que se suprima a sanción penal á difusión de mensaxes que "sirvan para reforzar a disposición para cometer desordes públicas", incorporada no Código Penal de 2015, o que pode levar a "sancionar declaracións e opinións expresadas antes das desordes públicas"
