As medidas para abaratar a cesta da compra dividen os socios de goberno

A escalada do prezo dos alimentos non ten freo. O Goberno busca con urxencia fórmulas que alivien as familias, pero as solucións enfrontan os socios. Podemos quere unha bonificación dun 14 % dunha selección de produtos da cesta da compra que se faría efectiva ao pasar por caixa, un sistema similar ao dos combustibles.

"Unha bonificación do 14 % para que o prezo dos produtos básicos baixe o antes posible", explica Ione Belarra, secretaria xeral de Podemos e ministra de Dereitos Sociais e Axenda 2030.

A parte socialista do Goberno rexeita esta proposta e di que as medidas que se adopten teñen que ser viables. "Non pode ser que se propoña unha folla de ruta que non se saiba como levar a cabo. Xa estamos vendo que tan importante é ter o deseño dunha lei como a súa aplicación", di a ministra de Facenda, María Jesús Montero.

Hai unha terceira proposta que defende Yolanda Díaz. A vicepresidenta segunda apunta aos supermercados. Propón como xa fixera hai meses chegar a un acordo co sector da distribución. "Teñen unhas marxes empresariais que son máis que relevantes. Polo tanto hai que seguir actuando", cre a tamén responsable de Traballo.

O ministro de Agricultura, Luis Planas, reunirase o próximo luns coas organizacións da cadea alimentaria pero xa adianta que poñer topes aos prezos prexudicaría especialmente o sector primario.

Os partidos que sosteñen a coalición de goberno, como é o caso do PNV, din que é serio que se adianten en público medidas que deberían debaterse previamente no seo do executivo. "Isto é un cachondeo. Que os socios de goberno estean debatendo en público nos medios paréceme alucinante", di o seu voceiro no Congreso, Aitor Esteban.

Pero non é o único asunto que divide a coalición. A postura respecto da  guerra en Ucraína volve ocupar o último debate entre PSOE e Podemos.

"Quero pedirlle ao Partido Socialista, ao noso socio de goberno que reconsidere a súa postura. Que recoñezamos un ano despois que ter contribuído á escalada bélica foi un erro", insiste Belarra.

"Saben cal é a postura do goberno de España de total apoio e unidade por parte dos aliados e da Unión Europea a Ucraína en todos os niveis", responde o presidente, Pedro Sánchez.

Con todo, o xefe do Executivo reivindica a folla de ruta do Goberno e di que o importante son os logros conseguidos nesta lexislatura.