As vítimas do Alvia reclaman en Santiago unha investigación técnica independente

As vítimas do Alvia manifestáronse esta mañá en Santiago no noveno aniversario do accidente de Angrois. Nesta ocasión a vista está posta no próximo mes de outubro cando comezará o xuízo dun sinistro que deixou 80 mortos e 144 feridos.

Un ano máis a marcha transcorreu desde a estación do tren ata o Obradoiro, e ademais de servir como recordo dos seus falecidos no accidente, foi de novo un acto de protesta pola instrución deste caso. As familias volveron esixir unha investigación independente e unha vez máis responsabilidades políticas.

Así insistía Esperanza Fernández, que perdeu a seu pai e a súa cuñada no accidente:

"Nove anos despois seguimos como ao principio pero máis enfadados. Con moito máis coñecemento e información. É un desgaste constante a peregrinaxe polas institucións, por Europa en busca do mesmo que levamos desde hai nove anos, que é xustiza, verdade e reparación"

E tamén Jesús Domínguez, voceiro da Plataforma de Vítimas do Alvia, e que viaxaba no tren hai nove anos:

"Tócanos seguir concentrándonos e reivindicando que se faga unha investigación técnica independente que todos os gobernos se negaron a facer nestes anos aínda que a Unión Europea o vén esixindo desde hai anos"

Algo que corrobora Ana Miranda, portavoz do BNG en Europa:

"Europa dixo claramente no seu momento: non se fixo unha investigación independente e non se foi ás causas profundas do accidente. Recentemente hai unha sentenza que di que tampouco foron escoitadas as vítimas e que a CIAF non cumpriu a súa tarefa"

Con esta situación, o xuízo comezará o próximo 5 de outubro na Cidade da Cultura e as vítimas din que os 9 anos de demora non son casuais, como afirmaba Jesús Domínguez:

"É un xuízo que empeza coxo e débil. Alegrámonos pero tamén temos que dicir as cousas que pensamos que están mal na xustiza e nas institucións. Lamentablemente as vítimas pensamos que haberá unha sentenza pero non vai haber xustiza porque hai vítimas e familiares, pais, nais e irmáns que xa faleceron e para eles nunca haberá xustiza"

Esta tarde as familias volverán á curva da Grandeira para ver pasar o Alvia que hai 9 anos non chegou á estación.

Rueda recorda o suceso durante a entrega das Medallas de Galicia

Para as vítimas do Alvia e os servizos de emerxencias que traballaron hai oito anos nesa xornada negra tivo hoxe unhas palabras de lembranza o presidente da Xunta na entrega das Medallas de Galicia.

Alfonso Rueda tamén recoñeceu o traballo realizado na última semana polos que participan nos operativos de loita contra os incendios forestais.