Asime ve posibilidades "moi relevantes" en Galicia para captar pedidos no sector da defensa nos próximos anos

O secretario xeral da Asociación de Industrias do Metal e Tecnoloxías Asociadas (Asime), Enrique Mallón, cualifica de "moi relevantes" as posibilidades de Galicia para captar proxectos industriais relacionados co sector da defensa ante o aumento dos pedidos dos gobernos de todo o mundo pola incremento das tensións xeopolíticas. Así o manifestou Enrique Mallón nunha entrevista no Galicia por diante da Radio Galega.

Neste senso, explica que "as nosas empresas, que non son aínda moitas en número, estamos a falar dunhas vinte empresas en Galicia que traballan dun xeito intenso, deben intentar chegar a acordos de colaboración con outras empresas de Asime para intentar dar resposta a eses novos proxectos que con total seguridade se están a negociar hoxe en día e que se van negociar nos próximos anos".

Enrique Mallón salienta que, dentro do metal, a automoción galega goza de boa saúde e considera xusto que a fábrica de Stellantis de Vigo sexa incluída como proxecto estratéxico para recibir fondos europeos no PERTE do Vehículo Eléctrico Conectado.

Sinala que "dende logo a automoción galega co que representa, practicamente 20.000 traballadores e unha das principais comunidades autónomas en España e en Europa na automoción, non pode quedar fóra desas axudas. Nós chamamos a que haxa unha boa comunicación, que parece que a hai, entre a factoría e o Goberno de España e que se teña en conta que a automoción galega merece un apoio público en equidade e en termos de xustiza con respecto a outras factorías en España. Confiamos en que, finalmente, existan eses apoios".

Enrique Mallón considera "estratéxica" a continuidade de Alcoa en San Cibrao para seguir producindo aluminio e resalta que "todas as potencias industriais do mundo teñen claro que hai que producir preto, que hai que ter as materias primas e os bens e servizos fundamentais para ser competitivos, senón o futuro industrial será moi negro para todos".

Sobre as últimas paralizacións xudiciais de parques eólicos en Galicia, o secretario xeral de Asime asegura que "hai nerviosismo, preocupación e sorpresa por estas decisións das últimas semanas" e avisa de que "se se alonga vai provocar unha perda de imaxe e de investimentos tremenda en Galicia". "Esiximos publicamente que se sexa moi rigoroso, que se saiba tamén quen está detrás de cada parálise e que intereses poden ter, pero, especialmente, os aspectos técnicos, que realmente provocan esas parálises e eses impactos que, en moitos casos, non se cuantifican e non se especifican", indica.

Ante a manifestación dos sindicatos o xoves en Vigo para protestaren ante a última vaga de mortes en accidentes do traballo, desde Asime din compartir esta preocupación, que "nos entristece" e salienta que "os datos de sinistralidade laboral nos últimos anos no metal en Galicia son mellores ano tras ano. Isto pode sorprender a algúns. O que pasa é que nos últimos dous anos tivemos varios accidentes mortais. Esta é a peor nova".

Di que a maioría de empresas do metal están traballando de maneira intensa para aumenta-la seguridade e fai un chamamento a todos para incrementaren os controis e seren rigorosos no cumprimento das medidas que eviten sinistros laborais.

"Nós chamamos aquí tamén á reflexión de todos, das administracións públicas para facer un maior control, das empresas que proven destes servizos de prevención, aos empresarios e directivos e aos propios traballadores. Moitas veces tamén os accidentes son por descoidos, por non seguir as indicacións que se dan e que está probado nos informes dos accidentes. Aquí hai que facer as manifestacións e a declaracións sen acritude, pero si con responsabilidade. Que haxa un control rigoroso de todo (...) para que non haxa mortes no noso sector e ese é o obxectivo que debemos perseguir todos".