Un matrimonio de Barbadás sospeita que lles caeu un meteorito no patio da casa

Antonio, de segundo apelido Rocha, leva todo o día a voltas coa pedra que apareceu inesperadamente no seu patio. Co impacto, rompeulle un anaco.

"Mirei para o chan e vin algo estraño. Pareceume unha pedriña pero, ao lle botar a man, vin que non era normal (...). Se lle dá a alguén na cabeza, coidado!", comenta.

Ten o tamaño dun ovo de galiña e unha textura irregular, co interior alaranxado e arxiloso e unha capa externa máis sólida e rugosa.

"Ten coma se estivera ardida polos laterais. Paréceme estraño. Aos meus 66 anos nunca vira nada igual. Pensei que podía ser un meteorito, pero non estou seguro", di Antonio.

O que pretenden Antonio e a súa muller é que alguén lles axude a resolver o misterio, por iso pensaron en darlle difusión ao seu achado.

Mentres tanto, para que non se siga deteriorando, consérvana nun cacharro de cristal.