A Volta homenaxea o Tigre de Carril, con 83 anos pedalea 100 km cada día

Imaxinan pedalear máis de 100 quilómetros diarios, unha media de 20.000 ao ano, aos 83 anos? Pois esas son as cifras que fixeron popular a Avelino Barreiro, un veciño do Carril, en Vilagarcía, ao que a Volta a España acaba de homenaxear esta fin de semana en Asturias. Fixo da súa paixón polo ciclismo a súa rutina diaria.

Coma cada día, Avelino Barreiro ergueuse cedo e ás 9 da mañá xa pedaleara 15 quilómetros coa bicicleta de montaña antes de atendernos. Logo cambiou á de estrada, porque pretende facer unha tirada de máis de 100 km hoxe e así chegar aos 14.000 rodados no que vai de ano. É a súa rutina diaria desde que se xubilou. A súa afección polo ciclismo vén de vello, pero cando enviuvou aos 55 anos, converteuno case nun modo de vida e no que ademais non repara en gastos...

Cando comezou saía en grupo, pero agora di que non é quen de seguirlles o ritmo e prefire rodar só. Fai tiradas de 12 horas diarias e aínda é quen de nadar ao rematar, porque lle senta ben.

O seu espírito de sacrificio levouno a superar un accidente grave en 2019 que o deixou nunha cadeira de rodas. Di que lles teme aos coches porque os condutores non respectan moito os ciclistas, pero asegura que seguirá pedaleando mentres o corpo aguante.

Como moitos deportistas colga os seus adestramentos nunha aplicación onde ten un exército de seguidores. A súa popularidade fixo que a organización da Volta a España lle rendera unha emotiva homenaxe esta fin de semana en Asturias. E agora o Tigre de Carril, o alcume polo que é coñecido, loce orgulloso o xersei vermello de líder que lle regalaron.