Aznar e Rajoy participarán no acto de Feijóo na rúa 48 horas antes da investidura

Os expresidentes do Goberno José María Aznar e Mariano Rajoy participarán o 24 de setembro no acto na rúa que protagonizará o líder do PP, Alberto Núñez Feijóo, a 48 horas do debate de investidura, que o PP anunciou inicialmente como un acto de "rexeitamento" contra a amnistía dos implicados no 'procés'.

Fpntes do PP trasladaron este venres aos medios a participación de ambos os expresidentes, despois de que Aznar asegurase onte que acudiría se o partido así o quería.

O PP informou ademais de que a cita, ao mediodía do 24 de setembro, móvese da primeira localización anunciada, a praza de España de Madrid, á avenida de Felipe II, por "cuestións de ocupación, dispoñibilidade e de accesibilidade".

Explica o PP que este acto de partido, ao que non convidou finalmente a outras formacións, "servirá para definir algunhas das prioridades que marcarán o discurso de investidura", defender a igualdade dos españois e tamén manifestar o "rexeitamento" do partido a calquera "formulación que pase por tratar dun modo diferente aos cidadáns dun ou outro territorio".

"Nese sentido, o risco de que o PSOE acepte amnistiar aos políticos que desafiaron ao Estado, borrar as consecuencias xurídicas do 'procés' e agasallar a quen desafiou a España contará co rexeitamento expreso do candidato, que lembrará que a súa proposta será diametralmente diferente", agrega o PP.

O PP define así os contornos do acto, un evento de partido no que Feijóo dará un discurso antes do da súa investidura e que tratará o rexeitamento á amnistía, pero non será unicamente en protesta contra esta esixencia de ERC e Junts.

Sobre Aznar e Rajoy destaca o PP que son "os dous dirixentes do PP que con anterioridade foron designados pola súa Maxestade o Rey para formar Goberno" e que "acompañarán a quen ten agora dita responsabilidade".

O PP busca ademais que este acto sirva para que "calquera cidadán poida escoitar en primeira persoa as prioridades de quen está a catro votos de ser presidente do Goberno". "Feijóo avanzará que faría el co seu país se tivese a posibilidade de ser presidente, pero tamén o que non faría nunca para presidir o Goberno de España", subliñan.

Feijóo e Aznar protagonizan este venres a  clausura do Campus Faes no medio da controversia pola chamada do expresidente a mobilizarse contra a amnistía, que provocou acusacións de golpismo por parte do Goberno.