Bolaños acusa os vogais conservadores do CXPX de "facer oposición" ao Goberno
Bolaños acusa os vogais conservadores do CXPX de "facer oposición" ao Goberno
O ministro pediu a renovación do órgano reitor dos xuíces durante a súa comparecencia na Comisión de Xustiza do Congreso
O PP pídelle que retire a lei de amnistía e as comisións de investigacións antes de negociar o Consello Xeral do Poder Xudicial
Félix Bolaños pedía este xoves na Comisión de Xustiza do Congreso respecto aos maxistrados, ante os ataques lanzados por Junts nas últimas semanas. "Quen cometa, ou tente, algunha inxerencia ou descualificación, terame en fronte", asegurou ante os deputados.
Para o PP estas declaracións non teñen "credibilidade" e piden o cesamento de "ataques desapiadados á xustiza".
Aínda así, o ministro de Xustiza si criticou a maioría conservadora do Consello Xeral do Poder Xudicial. Na súa opinión, "son oito vogais que fan claramente oposición ao Goberno" que "nin se molestan en intentar que pareza que son o órgano de goberno do poder xudicial".
A estas críticas de Félix Bolaños sumouse o socio da coalición. Para o deputado de Sumar Enrique Santiago, estes vogais "están operando como un partido político, sen presentarse ás eleccións" e "xa pasaron a organizar unha revolta".
Ante isto, o ministro confía en que mañá o presidente do Goberno e o líder da oposición cheguen a acordo para renovar o Consello, que leva cinco anos caducado. No PP poñen condicións. A deputada popular María Jesús Moro instou o executivo a retirar a lei de amnistía, a renunciar ás comisións de investigación e a facer "un exemplar borrón e conta nova" para poñerse a traballar "de verdade".
O ministro do ramo asegura que está disposto a explorar calquera fórmula. "Ao Estado de dereito e á democracia española tocaríalle mañá o Gordo se o PP se avén a renovar o CXPX", declarou Félix Bolaños.
