Cangas nadou, andou e correu para apoiar a investigación da ELA

Cangas do Morrazo moveuse pola esclerose lateral amiotrófica. Foron moitos os que nadaron, correron e andaron para recadar fondos para a ELA no paseo da praia de Rodeira.

Mirara un a quen mirara por baixo do arco da esperanza do evento estaba pensando niso de que a ELA só se curará con investimento para a investigación, algo que si está ocorrendo, por exemplo, co estudo do cancro, moito máis común que a ELA. Para a esclerose lateral amiotrófica non hai cura nin tratamento á vista.  

"Toda a xente que recibe un diagnóstico coma este o primeiro que pensa é que non hai tratamento que cure. E o que todos temos en común é a idea de intentar gozar do día a día e pensando que ninguén ten garantido o futuro, que simplemente que a min dixéronme xa algo concreto de como vai ser algo dese futuro. Pero intentando vivir día a día", conta a TVG Susi Seoane, á que lle diagnosticaron ELA en setembro do ano 2021.

Necesitan cartos para investigar e axudas para os coidados.

"Quen non teña medios é moi difícil que poida vivir. E eles só queren vivir. A súa mente está perfectamente. Meu irmán, que morreu pola ELA, dicía que o seu corpo tiña a enfermidade, non a súa cabeza. E que el ía normalizar a enfermidade. E así foi", explica Pilar Guimeráns, vogal de AGAELA. 

"Van xurdindo necesidades nun breve prazo de tempo, e facer fronte a todas esas necesidades supón uns recursos económicos moi altos, que hai moitas familias que non poden asumir. Está estimado que o gasto que pode ter unha familia ao ano está entre os 30.000 e os 50.000 euros", relata Jessica Garabal, que é terapeuta ocupacional en AGAELA.

Con este fin de facer caixa moitos inscritos no evento "Cangas do Morrazo móvese pola ELA" correron case nove quilómetros, camiñaron catro e nadaron medio.

Na praia de Rodeira os nadadores pola ELA foron recibidos como merecen, como heroes que se mollan por unha causa boa.