A Xunta aproba interpoñer un recurso de inconstitucionalidade contra a lei de amnistía

A Xunta aprobou este luns na súa primeira reunión do novo curso político presentar un recurso de inconstitucionalidade contra a Lei de amnistía.

Tras a reunión do seu Executivo, o presidente da Xunta e líder do PP galego, Alfonso Rueda, anunciou que este recurso interpoñerase de forma inmediata despois de que así o avalara o Consello Consultivo de Galicia e a Asesoría xurídica da Xunta.

Rueda xustificou o recurso de inconstitucionalidade contra a lei de amnistía ao considerar que rompe coa igualdade dos españois, a legalidade e o Estado de dereito.

O presidente da Xunta lembrou que xa advertiu no seu día que a Xunta actuaría en consecuencia cando considerase que as normas que aprobase o Goberno atentasen contra Galicia e prexudicasen os intereses dos galegos.

Asegurou que esta decisión adóptase tras un amplo traballo de documentación que evidencia que esta Lei orgánica "contradi artigos da Constitución como o 9.1", que establece que todos os cidadáns e poderes públicos estarán sometidos á Carta Magna e ao resto do ordenamento xurídico.

Apuntou que, segundo a Asesoría Xurídica da Xunta, a de amnistía trátase dunha lei que ten "consideración arbitraria", que "creba co principio de igualdade", que vulnera o principio de separación de poder ao "deixar sen efecto decisións firmes adoptadas polo poder xudicial" e que tamén "creba o principio de seguridade xurídica" ao actuar nun ámbito tan amplo e indeterminado.

Ademais, fixo fincapé na potestade de Galicia para presentar este recurso de inconstitucionalidade xa que o ordenamento español recoñece o dereito das comunidades para utilizar este recurso non só para “defender as competencias propias, senon tamén cando se considera que é necesario, como é este caso, restablecer a orde xurídica constitucional".

O recurso interpoñerase de forma inmediata unha vez complétense os trámites pendentes e, en todo caso, "antes do próximo 9 de setembro", garantiu Rueda, xa que nesa data finaliza o prazo para dar este paso. 

Alfonso Rueda criticou, doutra banda, que Pedro Sánchez siga sen convocar a conferencia de presidentes autonómicos, como se lle reclamou en varias ocasións. Cre que o presidente do Goberno non quere facelo, entre outras razóns, para non ter que dar explicacións sobre financiamento autonómico e sobre o acordo con Esquerra Republicana para darlle un tratamento fiscal singular a Cataluña.