Crían en Sarria un boi de raza rubia galega de máis de dúas toneladas

Marelo ten oito anos e estímase que podería chegar a pesar ata dúas toneladas e media. Este boi, criado na parroquia sarriá de Lier bate, por tanto, todas as marcas.

Está considerado o exemplar de raza rubia galega máis grande que houbo nunca, a maior res en todo o ámbito estatal e mesmo se encontran en trámites para rexistralo como o maior espécime de gando bovino de todo o mundo.

Ángel Rodríguez, tratante: "Agora mesmo o obxectivo é inscribilo no libro Guinnes dos Récords antes de sacrificalo. É un feito que, se se constata, vaille dar máis valor".

Manuel Valiña, criador do boi: "Foi criado a base de comer fóra con herba verde e millo, todo natural, porque un boi deste tipo ten que ter unha carne e calidade. Se comese pensos concentrados, podería ser aínda máis grande".

Ademais da alimentación, tamén conta a liñaxe do animal. Sinalan que un bo indicador da pureza xenética de Marelo é a súa pelaxe, salpicada dunha especie de pisadas de paxaro.

Manuel Valiña, criador do boi: "Cando naceu xa vin que ía ser un animal moi grande, porque traía unha estrutura distinta. E aos seis meses xa se viu que ía ser un fenómeno e capouse. Ten unha cor 'apesetada', que era a que tiña antes a rubia galega pura".

Marelo xa ten comprador e destino. Acabará nunha cadea de restaurantes de Hong Kong, da man do chef pontevedrés Francisco Pazos. Tocante ao seu prezo, podería acadar os 30.000 euros.