Desaloxan varios veciños dun edificio de Culleredo polo incendio nun garaxe

Varios veciños tiveron que ser desaloxados este luns dun edificio de Culleredo de nove andares, no que se rexistrou un incendio nun garaxe.

Segundo informa o servizo de Emerxencias 112 Galicia, o inmoble está situado na rúa Anxo Senra Fernández, no Burgo. Urxencias Sanitarias-061 tivo que atender unha persoa afectada por inhalación de fume.

Varias persoas comezaron a alertar, pouco antes das 11:00 da mañá, de que saía moito fume do garaxe. Deuse aviso aos bombeiros de Arteixo e da Coruña, así como á Policía Local de Culleredo.

Cando chegaron, os equipos de intervención comprobaron que ardían dous vehículos no interior do garaxe. O lume xerouse nun dos dous coches e propagouse ao segundo. 

Ao mesmo tempo, evacuouse a parte dos ocupantes do edificio, mentres que o resto dos veciños quedaron confinados nos seus domicilios.

A persoa tivo que ser atendida por inhalación de fume, foi trasladada en ambulancia ao Complexo Hospitalario Universitario da Coruña.

Os servizos de extinción ocupáronse de apagar as lapas, que afectaron a dous vehículos e, finalmente, procederon a ventilar o edificio. O seguinte paso será acceder ao seu interior para avaliar os danos e investigar o ocorrido, segundo informan os servizos de emerxencias municipais.