Detido en Cangas o home que lle quitou o ollo a outro cun balote

A Garda Civil detivo na mañá deste martes ao home que presuntamente disparou o pasado 30 de novembro cunha pistola de balotes en Cangas (Pontevedra) a outro home, o cal acabou perdendo un ollo, segundo confirmaron fontes do instituto armado.

A detención produciuse nun operativo da Garda Civil na mesma vivenda en cuxo portal se produciron os feitos, e os axentes localizaron, ademais, varias substancias estupefacientes e diñeiro.

A Garda Civil cre que o detido tirou a arma por unha xanela da vivenda, de modo que un dron está a buscala polos tellados lindeiros sen que de momento aparecese.

Os feitos sucederon entre as oito e as nove da noite do sábado 30 de novembro no portal da vivenda da vítima, situada na céntrica avenida Bueu.

A vítima, un home de 42 anos, foi ingresado no hospital Povisa de Vigo, e acabou perdendo o ollo.