Drons e prohibición de grandes ferramentas para evitar estragos nas praias de Nigrán na festa de San Xoán

Un San Xoán seguro, sen lixo e sen buratos. É o 'mantra' do concello de Nigrán para a súa festa máis senlleira. E por iso están coordinando un operativo de seguridade que implicará case 200 efectivos entre Garda Civil, Policía Local e Autonómica, Protección Civil, Seprona e Tráfico. Por primeira vez haberá drons da unidade Pegasus da Garda Civil. 

Esteban Tejero, Oficial Policía Local de Nigrán conta que "durante as horas de luz a función principal será evitar que se fagan buratos de grandes proporcións e luminarias con moita madeira, e xa pola noite  será a seguridade cidadá, buscar os puntos quentes que podamos atopar na praia de agresións ou pelexas".

Festa si, pero con sentidiño, e luminarias a pequena escala. Queren evitar a desfeita do ano pasado en Praia América, cando milleiros de persoas converteron o areal nunha paisaxe lunar chea de cráteres.

Un veciño conta horrorizado o que pasou o ano pasado: "Iso foi tremendo, un auténtico pesadelo. Visto dende o aire, dende os drons foi algo incrible, cráteres en que cabían 14, 15 ,16 mozos, metidos no fondo. Recuperar iso despois é imposible".

Controlaranse os accesos á praia para evitar a entrada con ferramentas ou pas, e os infractores poderán ser sancionados con ata 200.000 euros de multa.

"O día seguinte a praia ten que estar funcional e non e o mesmo meter a máquina nunha praia como está a agora que nunha praia chea de buracos", di un veciño, e outra que "cada ano cambia tamén o curso do río e está tamén cambiando a orografía da praia continuamente. Entendo que si encima facemos buracos será cada vez peor". 

Haberá dous hospitais de campaña e, un ano mais, o concello instalará o chamado Punto lila para atender as mulleres ante posibles agresións. Tamén se reforza a rede de transporte público para desaloxar canto antes o areal.