Feijóo clama contra a "indignidade" da amnistía arroupado por milleiros de persoas

O líder do PP, Alberto Núñez Feijóo, prometeu defender unha España "de cidadáns libres e iguais" fronte a unha amnistía que non se votou, sexa dende un "mitin, unha manifestación" ou desde o Congreso e custe o que custe, incluída a presidencia do Goberno.

Ante as 40.000 persoas que, segundo os cálculos da Delegación do Goberno, seguiron o seu mitin na madrileña avenida Felipe II, Feijóo sinalou que poden discutir "democraticamente se os españois votaron cambio ou non", pero "o que non votou ningún español, polo menos o 94 %, foi un cambio no réxime constitucional".

"Iso non se votou, é unha fraude, agravada e reiterada pola mesma persoa. Non imos negociar as fraudes (...) Non nos chamen parvos aos españois porque non somos parvos. O que fan só ten un nome, indignidade, uns cómplices, o PSOE actual, e só un responsable, que está no Pazo da Moncloa despois de perder as eleccións", exclamou.

Feijóo provocou ademais o aplauso dos presentes ao dar as grazas aos 33 deputados de Vox que apoiarán a súa investidura, aos deputados de Coalición Canaria, a UPN e tamén "aos membros do PSOE" que defenden o que defenderon sempre.

O candidato popular á investidura chegou ao acto acompañado polos expresidentes do Goberno José María Aznar e Mariano Rajoy. Minutos antes entraban na praza os presidentes autonómicos do partido e os anfitrións, José Luis Martínez-Almeida e Isabel Díaz Ayuso.

"Ditadura opresora"

Na súa intervención, a presidenta da Comunidade de Madrid asegurou que "dicir amnistía é dicir que España é unha ditadura opresora" e que "en Cataluña hai un conflito e non unha minoría independentista totalitaria facendo caixa á conta de todos".

Segundo Ayuso, falar de amnistía equivale a soster "que o golpe (de Estado)" do procés independentista "estivo ben dado" e "foi xusto" e, por tanto, "nunca houbo un delito" e "os xuíces españois son prevaricadores".

"Alzar a voz"

O expresidente do Goberno José María Aznar arengou as persoas asistentes a alzar a voz e non calar fronte á "infamia" dunha amnistía ao "intento golpista" do procés e reclama que "todos os que poidan decidir, decidan en conciencia" en defensa da igualdade.

"A Constitución e a cidadanía non son moeda de cambio para satisfacer a golpistas", exclamou.

Ao seu entender, cando Sánchez fala de "desxudicializar un intento golpista", o que quere dicir é: "Non vos preocupedes porque se me votades dareivos a unidade de todos os españois e todos os españois van pagar o golpe que tentastes e o novo que ides volver tentar".

"Falsidades para xustificar o inxustificable"

Pola súa banda, o expresidente Mariano Rajoy asegurou que o seu partido alzará a voz contra “as falsidades para xustificar o inxustificable e maquillar o que resulta indecoroso” e oporase a “calquera que queira construír un Goberno sobre as ruínas do Estado de Dereito”.

Subliñou que a amnistía non cabe na Constitución e tampouco estaba en ningún programa político polo que, de aprobárense, sería “unha fraude, sobre todo para quen lle votou” (ao PSOE) nas eleccións do 23-X.

"(Aprobar unha amnistía suporía) unha emenda á totalidade da nosa Constitución e a nosa democracia por unha única razón: o interese particular dunha única persoa que persegue un único interese sen importarlle nada nin ninguén", clamou.

"Ese non é o camiño"

Unha delegación popular de Galicia acudiu a Madrid para arroupar o candidato á investidura nesta defensa da igualdade dos españois e contra os privilexios a unha comunidade autónoma en detrimento doutras.

Alfonso Rueda insistiu en que isto non se pode permitir e sobran os motivos para dicirlle a Pedro Sánchez que "ese non é o camiño".