Guterres abre a Asemblea da ONU: "O mundo está en perigo e paralizado"

O secretario xeral da ONU, António Guterres, abriu este martes a reunión anual de líderes na Asemblea Xeral cunha dura advertencia sobre a situación dun mundo cada vez máis fracturado, desigual e incapaz de resolver os grandes problemas que afectan a todos.

"O mundo está en perigo e paralizado", dixo Guterres aos xefes de estado e de goberno reunidos en Nova York, a quen esixiu cooperación e medidas urxentes para atallar os efectos das guerras, contra a crise alimentaria e ante o cambio climático.

O xefe de Nacións Unidas insistiu en que os grandes desafíos mundiais non poden resolverse en solitario ou con alianzas de países, senón que é necesaria unha gran "coalición mundial".

"Temos un inverno de descontento global no horizonte. Hai unha intensa crise de custo da vida. A confianza estase desmoronando. As desigualdades están a explotar. O noso planeta está a queimarse. A xente está a sufrir e os máis vulnerables son os que máis", avisou.

Nun longo discurso, Guterres tocou todos os grandes asuntos da actualidade internacional, empezando por unha crise alimentaria agravada pola guerra en Ucraína e que ameaza con desencadear grandes fames negras en varios países.

Nese sentido, subliñou a necesidade de arranxar os problemas coa subministración de fertilizantes, para o que a ONU está a tratar de facilitar as exportacións desde Rusia, unhas exportacións que non son obxecto de sancións internacionais pero víronse minguadas desde o inicio do conflito.

"Este ano o mundo ten suficiente comida, o problema é a distribución. Pero se non se estabiliza o mercado dos fertilizantes, o ano que vén o problema pode ser a subministración de alimentos en si", alertou.

Sobre a guerra en Ucraína, Guterres denunciou que a invasión rusa desencadeou unha "destrución xeneralizada con violacións masivas dos dereitos humanos e a lei humanitaria internacional", cobrouse miles de vidas, desprazou a millóns de persoas e está a afectar miles de millóns en todo o mundo.

Ademais, lembrou, o conflito está a agravar a fractura internacional e hoxe hai "inmensos perigos para a paz e seguridade globais" e un "ruído de sabres nucleares" que non fai máis que agravar a inestabilidade.

"Non hai cooperación. Non hai diálogo. Non hai resolución colectiva de problemas", lamentou, urxindo a crear novos mecanismos para resolver esta división.

Guterres abordou tamén a crise económica e os efectos da inflación galopante, sobre todo nos países máis vulnerables.

"Uns 94 países -fogar de 1.600 millóns de persoas, sobre todo en África- enfróntanse a unha tormenta perfecta: as consecuencias económicas e sociais da pandemia, o aumento dos prezos de alimentos e enerxía, unha carga de débeda demoledora, unha inflación vertixinosa e falta de acceso a financiamento", sinalou.

En resposta, reclamou ao G20 -o grupo que reúne ás economías máis poderosas- un gran paquete de estímulo para aliviar esta crise e rescatar os Obxectivos de Desenvolvemento Sostible.

O discurso de Guterres deu a saída á Asemblea Xeral da ONU, ante a que intervirán ao longo desta semana uns 150 xefes de Estado e de Goberno.