Guterres insta a Rusia a colaborar na investigación do masacre de Bucha

O secretario xeral da ONU António Guterres remarcou este xoves a importancia da investigación sobre a posible comisión de crimes de guerra no municipio de Bucha durante a ocupación rusa e instou a Moscova a aceptar esa investigación e colaborar con ela. "Apelo á Federación Rusa a aceptar a Corte Penal Internacional e colaborar con ela", dixo Guterres durante a súa visita á foxa común de Bucha.

"Cando falamos de crimes de guerra non podemos esquecer que o peor dos crimes é a guerra por si soa. "O exército ruso continúa afianzando as posicións gañadas no sueste ucraíno, onde nas últimas horas afirma que destruíu dous almacéns de armas e derrubou un avión de combate.

Durante a súa visita ás localidades de Bucha e Borodianka, o secretario xeral da ONU dixo sentirse horrorizado e que é necesaria unha investigación exhaustiva sobre os posibles crimes de guerra perpetrados durante a ocupación rusa.

O secretario xeral da ONU está de visita en Ucraína para reunirse co presidente Volodimir Zelenski esta tarde.

Rusia intensifica a súa ofensiva no Donbás e no sur

O exército ruso dedicouse nas últimas horas a concentrar tropas e armamento na zona de Izium, próxima á rexión do Donbás, fronteiriza con Rusia, e intensificou a súa ofensiva para controlar esta zona e o sur de Ucraína.

As novas autoridades prorrusas de Khersón anunciaron que o rublo será oficial nesa rexión a partir do próximo 1 de maio.

Entrementres, os militares que permanecen cercados polas tropas rusas na planta siderúrxica de Azovstal, na cidade costeira ucraína de Mariupol, pediron ser evacuados porque hai 600 feridos e moitos deles necesitan axuda médica.

A ONU anunciou que está a preparar xa unha operación xunto ao Comité Internacional da Cruz Vermella para evacuar canto antes os civís refuxiados na siderúrxica en virtude do principio de acordo pechado o mércores entre Guterres e o presidente Putin.