Lea entre dous xubilados de Cerceda cunha catana de por medio

Un home acudiu ao hospital con feridas supostamente provocadas polo seu veciño cunha catana. Ningún dos dous implicados quixo falar con nós á cámara, pero as súas mulleres si que o fixeron de xeito privado para acusarse mutuamente do ataque.

Tampouco o resto de veciños da zona quere implicarse neste conflito privado. Un conflito que si nos explican vén de moi lonxe, de hai máis de 40 anos, por uns terreos e uns lindes que crearon unha grande inimizade entre eles.

De feito tamén nos confirmaron outros veciños que non é a primeira contenda física entre os dous xubilados. Un por riba e outro rozando os 80 anos, levan toda unha vida ás leas no lugar do Ouriño, en Cerceda.