López Acuña non descarta que España chegue ao milleiro de casos de varíola do mono
López Acuña non descarta que España chegue ao milleiro de casos de varíola do mono
O exdirectivo da OMS insiste en que a varíola do mono non é unha doenza con potencial masivo de infección coma a covid
Insiste na necesidade de frear as cadeas de transmisión con illamento de casos e rastrexo exhaustivo
Descarta a vacinación masiva e insiste en inmunizar só os infectados e os contactos estreitos
Daniel López Acuña, o que fora directivo da Organización Mundial da Saúde (OMS), prevé que o número de casos de varíola do mono en España chege ao milleiro pero limita a súa gravidade. Nunha entrevista no Galicia por diante fin de semana da Radio Galega, López Acuña di que "non é unha enfermidade con potencial masivo" para infectar coma a covid pero insiste na necesidade de "frear as cadeas de transmisión".
"Se tomamos esas medidas de maneira rápida, podemos frear en grande medida a diseminación. Aínda teremos casos, podemos chegar incluso ao milleiro de casos en España pero a cuestión é frear rapidamente e rastrexar exhaustivamente".
López Acuña opina que non é necesaria unha vacinación masiva da poboación senón aplicar a chamada "vacinación en círculos concéntricos", isto é, inmunizar coa vacina da varíola as persoas infectadas e os seus contactos estreitos, familiares e persoal sanitario que estea en contacto con estes infectados.
