Lores encara o seu sétimo mandato en Pontevedra e agradécelle ao PSOE facelo posible

O nacionalista Miguel Anxo Fernández Lores, proclamado este sábado alcalde de Pontevedra co apoio dos nove edís do seu partido e dos cinco socialistas, fronte aos once obtidos polos populares que o 28-M o avantaxaron en votos e escanos, agradeceulle ao PSOE facer hoxe posible a súa elección.

Tras prometer o cargo, dirixiuse ao cabeza de lista do PSdeG, Iván Pontes, para dicirlle que nunca esquecerá a "xenerosidade" demostrada e, como xa fixera na noite electoral, dixo que encara o seu sétimo mandato coa obrigación moral "de facelo mellor" despois da perda de dous edís respecto á lexislatura previa.

Lores, que ocupa a alcaldía de maneira ininterrompida desde 1999, e que xamais logrou unha maioría absoluta, enfrontouse nesta xornada a outro candidato, Rafa Domínguez, que, sen posibilidades reais, tentou ser rexedor e que reivindicou unha vez máis a vitoria "contundente" dos populares nos últimos comicios municipais.

O BNG e o PSOE sumaron catorce edís, fronte aos once do PP de Domínguez, que dixo que o seu partido é, con todo, o que mellor "entendeu" as necesidades dos cidadáns pontevedreses.

Lores prometeu "unha nova etapa", así como "unha mirada limpa", e convidou "coa man tendida" e "cos brazos abertos" a todos os grupos, sen excepción, a traballar para avanzar na dirección correcta "desde o respecto polas lexítimas diferenzas e discrepancias".