Luz Casal, medalla das artes e as letras de Francia

A coreógrafa e bailarina española Blanca Li e a cantante Luz Casal recibiron este martes as condecoracións de oficial e comendadora, respectivamente, da Orde das Artes e as Letras de Francia, en recoñecemento ás súas exitosas carreiras e ás súas contribucións ao mundo da música e a danza.

"É bastante agradecido e ilusionante, e doutra banda dá como un pouquiño de responsabilidade", dixo Casal á prensa en París, xa investida como comendadora tras unha cerimonia no Ministerio de Cultura francés.

A cantautora galega, que acaba de publicar o seu disco número 17 con temas inéditos (Las ventanas de mi alma), asegurou que ten moito "que agradecerlle" a Francia, un país que sempre acolleu a súa música cos brazos abertos.

Pero aínda así, custoulle crer este recoñecemento cando recibiu a notificación. "Pensei que se equivocaran!", compartiu a intérprete de éxitos como "No me importa nada". No que Casal non tivo dúbidas foi en rexeitar facer comparacións entre o apoio á cultura en Francia e en España.

Luz Casal explicou que "Facer ese tipo de comparacións é feo. Eu síntome súper querida, acabamos de facer dous concertos moi bos, un en Barcelona e outro na Coruña, e só faltaría que me queixase".

A encargada de entregar as medallas que van cos novos rangos de Casal e de Li foi a ministra de Cultura francesa Rima Abdul Malak, quen encomiou as contribucións á arte de ambas e celebrou os seus vínculos con Francia.

Sobre Casal, a ministra mencionou como o tema "Piensa en mí" pon "a carne de galiña" e lembrou que non hai outra artista española que enchese durante cinco noites seguidas a sala La Cigale (unha das máis importantes de París), como ela fixo en 1998.

De Blanca Li destacou a forma na que "corpo e corazón" se aliñan na súa danza, o seu paso pola movida madrileña nos oitenta e a súa carreira en Nova York e en París.

Na capital francesa, en 2019, a andaluza xa foi "instalada" como integrante da Academia de Belas Artes de Francia. "Francia é un país que foi moi importante para a miña carreira, pero España é a base da miña carreira, todo o meu pasado, a miña infancia".

"Ademais, agora como directora dos Teatros del Canal (Madrid) estou a reencontrarme con todos os artistas marabillosos españois", afirmou Li, que ademais da española ten tamén a nacionalidade francesa desde hai cinco anos e vive entre Madrid e París.

"Encántame ser española e encántame ser un pouco francesa", agregou. A bailarina declarouse moi "feliz", en calquera caso, de recibir a distinción da Orde das Artes e as Letras francesa, co engadido especial de poder compartir o momento con Luz Casal.

"Coñecémonos desde que tiñamos moi poucos anos", explicou á prensa. O rango de comendador é o máis alto da Orde das Artes e as Letras, que foi creada en 1957 para recompensar persoas "destacadas polas súas creacións no campo artístico ou literario ou pola súa contribución á influencia das artes e a literatura en Francia e no mundo".

Tras o de comendador, o segundo en importancia é o de oficial e o terceiro o de cabaleiro. Asígnanse en función de criterios como a duración das carreiras.