Esta primavera repartíronse en Galicia máis de 7.000 trampas contra as velutinas
Esta primavera repartíronse en Galicia máis de 7.000 trampas contra as velutinas
Adiantar a retirada dos niños é unha das medidas do Plan de vixilancia e control acordado entre a Xunta e a Fegamp
A Asociación Galega de Apicultura vai probar un novo método de loita contra a avespa asiática nesta campaña
Desde comezos de marzo repartíronse máis de 7.000 trampas contra a avespa velutina. A previsión de Seaga, a empresa pública encargada do plan de vixilancia e control, é que se repartan nesta campaña arredor de 20.000.
As trampas están xeolocalizadas e repártense en función dos avisos recibidos en cada lugar o ano pasado.
“As provincias da costa xa están cubertas, e en Ourense e Lugo xa se empezou a traballar. Estamos collendo moitas raíñas de velutina, que é o obxectivo neste momento”, explica Luísa Piñeiro, directora de Seaga.
A Asociación Galega de Apicultura vai probar un novo método de loita contra a velutina nesta campaña. O que buscan é inutilizar os niños a través dunha proteína que impide a transformación das larvas.
"Aplícase introducida nun cebo proteico, carne ou peixe. Esta proteína o que fai é impedir a muda, que as larvas se transformen en insectos adultos”, explica José María Bello, tesoureiro da Asociación Galega de Apicultura.
O ano pasado houbo máis de 56.000 avisos por niños de avespa velutina, o que supón un 40 % máis ca no 2022. A diferencia da campaña pasada, a aparición da avespa asiática vai este ano con atraso, arredor de 40 días máis tarde do que é habitual.
