As medidas económicas centrarán o debate sobre o estado da nación
As medidas económicas centrarán o debate sobre o estado da nación
Sánchez anunciará un paquete de medidas económicas para favorecer a clase traballadora
Dende o Partido Popular aseguran que estamos nun momento moi delicado cun Goberno peor que o do 2008
Sete anos sen debate sobre o estado da nación. Agora chega o primeiro con Pedro Sánchez no medio dun contexto moi delicado. Así que as medidas económicas centrarán o debate, medidas, asegura a voceira do Goberno, Isabel Rodríguez, destinadas a mellorar a vida da clase traballadora.
"Van ser medidas dirixidas á clase media e traballadora deste país e medidas de resposta a unha situación excepcional", adianta Isabel Rodríguez, voceira do Goberno.
Dende Unidas Podemos esíxenlle ao Goberno un cambio de rumbo e insisten na necesidade de adoptar medidas sociais.
"Ímonos esforzar de convencer o PSOE de que o diñeiro está mellor investido nas propostas sociais que está facendo Unidas Podemos ca en carros de combate ou avións de combate", di Javier Sánchez, de Unidas Podemos.
Este debate sobre o estado da nación vaise celebrar cando a vicepresidenta segunda, Yolanda Díaz, asegura que ao Goberno lle falta alma e tamén "medidas felices".
"É verdade que non abonda con xestionar, digo sempre que a este Goberno lle falta alma e que nos faltan medidas felices", comenta Yolanda Díaz, vicepresidenta segunda do Goberno.
"Este é un goberno que actúa con corazón, que actúa con intelixencia", responde a voceira do Goberno, Isabel Rodríguez.
E cunha oposición que ve o Goberno incapaz de saír desta situación.
"Afrontamos unha crise semellante á do 2008, pero cun Goberno incluso peor ca o do 2008", di Esteban González Pons, do Partido Popular.
