Milleiros de fieis acoden ao santuario dos Milagres de Amil no día grande da festa

A Virxe dos Milagres congrega este domingo, no seu día grande, fieis de toda Galicia.

"Viñemos de Bueu á unha da mañá".

"Nós vimos de Pontevedra".

"De Vigo".

"De Santiago".

"Eu veño de Noia, son devoto desta santa".

Algúns, como é tradicional, chegan ao santuario despois de camiñar durante quilómetros.

"Dezaoito creo que foron, dezaoito ou vinte quilómetros".

"Nós vimos desde Valga, levamos 20 quilómetros".

Segundo a tradición relixiosa, no século XVIII a Virxe atendeu as pregarias dun labrego que pedía auga para os seus cultivos arruinados pola seca. Desde entón cada fiel trae a súa ofrenda e a súa pregaria.

"Veño cumprir unha promesa que levaba catro anos pendente de facer, e este ano ímola cumprir".

"Empezamos vindo por un problema familiar hai moitos anos e despois xa seguimos vindo todos os anos, se non vimos parece que nos falta algo".

"Por unha filla que tivo moitas operacións, esta é por ela".

"Vimos pedir por unha boa tempada, somos xogadoras dun equipo de fútbol sala e como non nos dá tempo a facer o Camiño de Santiago dixemos: pois imos á aventura".

As longas ringleiras para acceder ao santuario mantivéronse durante toda a mañá.

"Hai que vir e ter fe, téñolle moita fe".

"Veño todos os anos para pedir cousas, ás veces concédense e outras veces non".

"Primeiro darlle as grazas, e logo despois oír a misa. E punto, tomar unha tapiña de polbo e xa está".

Hoxe é o día grande pero non o último. A festa vai seguir en Amil ata o 25 de setembro.