Milleiros de persoas marchan contra as reformas do Goberno na Arxentina

Milleiros de persoas saen á rúa en Bos Aires para protestar polos plans económicos do novo Goberno arxentino que preside Javier Milei.

Os asistentes á mobilización consideran que o decreto de necesidade e urxencia (DNU) sancionado o pasado 20 de decembro polo presidente non é "constitucional".

A norma contén máis de 300 reformas de leis e normas coas que Milei practicamente pretende acometer a desrregulación da economía arxentina. Modifican o réxime laboral, facilitan as privatizacións e os despedimentos e derrogan numerosas leis.

Nas últimas horas Milei paralizou a renovación de máis de 5.000 contratos de funcionarios.

Minutos antes de iniciarse a mobilización, o sindicato convocador, a CXT, presentou un recurso de amparo ante a Corte Suprema para que suspendese os puntos do DNU referidos á reforma laboral.
Finalmente, a Xustiza arxentina desestimou o recurso da CXT por un fallo formal, pero aceptou que a central sindical volva presentalo o venres, cando se prevé que o DNU entre en vigor definitivamente (de momento, este só foi asinado polo presidente).

O recurso exposto pola CXT súmase a unha decena de amparos xudiciais que xa se presentaron en contra o decreto.

Durante as protestas foron detidas seis persoas.