Publicada a convocatoria das eleccións do 28-M: xa se pode solicitar o voto por correo

O Boletín Oficial do Estado publica o decreto de convocatoria das eleccións municipais do 28 de maio.

Comeza así a conta atrás para uns comicios que, xunto ás autonómicas que se celebrarán ese mesmo día en moitas comunidades, debuxarán un novo mapa político que, para moitos, pode ser antesala dun cambio na Moncloa.

O 28 de maio tamén será a quenda das eleccións autonómicas nas seguintes comunidades: Aragón, Asturias, Canarias, Cantabria, Castela-A Mancha, Comunidade Valenciana, Estremadura, Illas Baleares, Comunidade de Madrid, Rexión de Murcia, Navarra, A Rioxa, Ceuta e Melilla.

Máis de 2,2 millóns de galegos chamados ás urnas

Un total de 2.225.962 galegos, dos que 2.216.522 de nacionalidade española e outros 9.440 estranxeiros residentes nesta comunidade, están chamados a participar o próximo 28 de maio nas eleccións municipais, segundo o censo do Instituto Nacional de Estatística.

A provincia da Coruña é a que conta con maior número de votantes, un total de 922.110 de nacionalidade española e outros 2.297 estranxeiros; seguida da de Pontevedra, con 772.423 e 3.337, respectivamente.

Na provincia de Lugo están censados 269.099 votantes de nacionalidade española e 1.173 doutros países, mentres que na de Ourense hai 252.890 e 2.633, respectivamente, segundo os datos do INE.

Estas son as principais datas do calendario electoral:

- 5 de abril, ábrese o prazo para que os partidos designen representantes ante as xuntas electorais provinciais. O prazo expira o 14 de abril.

- Do 5 ao 19 de abril, publicación nos boletíns oficiais dos locais e lugares públicos reservados para a realización gratuíta dos actos de campaña electoral

- 7 de abril. Constitúense a xuntas electorais provinciais e de zona con vogais xudiciais

- 14 de abril. Expira o prazo para a comunicación á Xunta Electoral de Zona (JEZ) da creación dunha coalición electoral

- 25 de abril. Os partidos poden comezar a solicitar un adianto do 30 por cento dos subvencións para gastos electorais

- 26 abril. Os diferentes boletíns provinciais publican as candidaturas electorais presentadas.

- 1 de maio. Proclamación das candidaturas legalmente presentadas

- 2 de maio. Publicación nos diferentes boletíns provinciais das candidaturas proclamadas

- 3 de maio. Comeza o aboamento do adianto do 30 por cento das subvencións electorais aos administradores das candidaturas que o solicitaron

- 8 ao 24 de maio. Período para que os electores remitan os seus votos por correo en España

- 12 de maio. Ás cero horas do venres 12 de maio comeza a campaña electoral.

- 18 de maio. Último día para solicitar o voto por correo en España.

- 23 de maio. Comeza a prohibición para publicar sondaxes electorais

- 26 de maio. Ás doce da noite conclúe a campaña electoral

- 27 de maio. Xornada de reflexión

- 28 de maio. Xornada de votación. Os colexios electorais abren ás 9 horas e péchanse ás 20 horas

- 3 de xuño. Conclúe o prazo para o escrutinio oficial por parte das Xuntas Electorais de Zona

- 4 de xuño. Comeza o prazo para a proclamación de electos por parte das xuntas electorais

- 17 de xuño. Constitución dos concellos nos que non se presentaron recursos contra a proclamación dos candidatos electos.