O BOE publica a disolución das Cortes e a convocatoria de eleccións o 23 de xullo

O Boletín Oficial do Estado (BOE) publica este martes o real decreto de disolución do Congreso e do Senado e de convocatoria de eleccións xerais para o próximo 23 de xullo.

O decreto entra en vigor este mesmo martes, polo que hoxe mesmo as Cortes quedarán disoltas ata que o 17 de agosto, día en que as cámaras resultantes se reunirán ás 10:00 horas en sesións constitutivas e quedará constituída a XV lexislatura.

Segundo o real decreto, a campaña electoral durará quince días: comezará ás cero horas do venres 7 de xullo, festividade de San Fermín, e finalizará ás vinte e catro horas do día 21.

En aplicación do artigo 162 da Lei Orgánica do Réxime Electoral Xeral (LOREG), establécense as 52 circunscricións electorais, que se corresponden con cada unha das cincuenta provincias españolas, ademais das cidades autónomas de Ceuta e Melilla.

O 23 de xullo serán elixidos 350 deputados, con Madrid como a provincia con maior número de escanos (37), os mesmos que na anterior convocatoria de 2019, seguida de Barcelona (32), Valencia (16), que contará cun máis que nas últimas eleccións xerais, e Sevilla e Alacante con 12 escanos.

Segundo o real decreto, en cada circunscrición provincial elixiranse catro senadores, nas circunscricións insulares elixiranse tres en Gran Canaria, Mallorca e Tenerife e un en Eivissa-Formentera, Menorca, Forteventura, Gomera, El Hierro, Lanzarote e A Palma.

As cidades autónomas de Ceuta e Melilla elixen cada unha delas dous senadores.