O comisario Reynders urxe a renovar o Poder Xudicial e despois negociar a reforma do modelo de elección

Nunha apertada axenda con comparecencia no Congreso e reunións cos órganos xudiciais, as asociacións profesionais, os partidos políticos e o Goberno, o comisario europeo de Xustiza insta a desbloquear de urxencia a renovación do órgano de goberno dos xuíces españois.

"Abrir rapidamente a renovación do Consello Xeral do Poder Xudicial e despois negociar a reforma", aclara Reynders.

A Comisión Europea avoga porque sexan elixidos polos propios xuíces. O PP está de acordo coas recomendacións pero quere negociar todo ao mesmo tempo, incluída tamén a renovación do Constitucional.

"Estamos dispostos a renovar os órganos inmediatamente", asegura Pons.

"Estamos dispostos a renovar os órganos inmediatamente e cumprir coa outra recomendación da Comisión Europea de que se cambie o sistema de elección do Consello Xeral do Poder Xudicial. Negociémolo todo á vez, non?", dixo González Pons tras a reunión con Reynders.

"Para cumprir a lei non se poden poñer condicións", asevera Bolaños.

Pola súa banda, o Goberno afea a nova posición do PP, unha "nova escusa" para non chegar a acordo. "O documento que lle trasladei ao comisario Reynders coas 19 escusas do Partido Popular para non renovar o consello inclúe a de hoxe, que é unha nova escusa, diferente á de hai unhas semanas", di o ministro da Presidencia, Félix Bolaños tras a xuntanza.

E incide: "Din que ten que haber unha renovación con condicións e liñas vermellas. Para cumprir a lei non se poden poñer condicións".

Lesmes dimitirá a vindeira semana se non hai acordo

Partido Popular e Goberno acúsanse de danar a imaxes exterior de España. E o presidente do Supremo e do Poder Xudicial mete presión. Lesmes anuncia que dimitirá a próxima semana se o PP e o PSOE non se poñen de acordo na renovación do consello.