O CXPX non avala a García Ortiz para o cargo de fiscal xeral do Estado

O pleno do Consello Xeral do Poder Xudicial considerou, por 8 votos a 7, que Álvaro García Ortiz non é idóneo para o cargo de fiscal xeral do Estado e emite así unha opinión que non é vinculante, polo que o Goberno poderá seguir adiante coa súa renovación, pero que si é inédita en democracia, xa que ata o de agora o CXPX non informara en contra do candidato de Moncloa.

As fontes do órgano de goberno dos xuíces consultadas por Europa Press sinalan que, dos 16 vogais que forman actualmente o CXPX -10 conservadores, incluído o presidente interino, Vicente Guilarte, e 6 progresistas- só 15 participaron no debate sobre García Ortiz.

O vogal Enrique Lucas, aliñado habitualmente co bloque progresista, ausentouse porque o seu irmán, Pablo Lucas, é un dos cinco maxistrados que asinan a recente sentenza do Tribunal Supremo que achacou a García Ortiz unha "desviación de poder" por ascender a súa predecesora, Dolores Delgado, á máxima categoría da carreira fiscal por estar á fronte do Ministerio Público.

O Consello declarou non idóneo a García Ortiz por 8 votos contra 7. Informaron en contra os vogais Ángeles Carmona, Nuria Díaz, José María Macías, Juan Manuel Fernández, Gerardo Martínez Tristán, José Anotnio Ballestero, Wenceslao Olea e Carmen Llombart. Por contra, apoiárono Guilarte, Roser Bach, Juan Martínez Moya, Clara Martínez de Careaga, Pilar Sepúlveda, Álvaro Custa e Mar Cabrejas. Ata o de agora, o CXPX avalara os candidatos elixidos polo Goberno, primeiro por unanimidade e xa nos últimos tempos con oposición interna.