O Fabril golea ao pechacancelas tras o descanso (3-0)

A resistencia do Laredo, pechacancelas da Segunda Federación con so sete puntos, durou ata o descanso. O Fabril resolveu saíndo en tromba na segunda metade, con tres goles en menos dun cuarto de hora que o deixan con 25 puntos axexando os postos de promoción.

Os coruñeses dominaron o partido desde o comezo, pero non estiveron atinados de cara á portería de Óscar Santiago na primeira metade. Quedou claro xa no remate de Guerrero moi cruzado no primeiro minuto de xogo. Tamén crearon perigo a balón parado, logo dun córner que petou en Carral e parou Óscar Santiago, ou noutro que Marotías rematou alto despos dunha contra de Fabi.

O Laredo limitábase a defender a súa portería, pero tivo unha boa acción nas botas de Antonio Poo, que rematou por dúas veces topando con Alberto. Outro córner rematado por Aarón, unha gran combinación de Luisao e Guerrero á que non chegou Kevin por moi pouco, e outro man a man de Fabi que tamén detivo Óscar Santiago tampouco puideron rachar a igualada inicial antes do descanso. 

A volta de pausa, o equipo coruñés destapouse. Seguiu dominando con autoridade, pero os seus dianteiros aqtinaron na porta do pechacancelas. Guerrero abriu a conta nunha xogada con dous remates no minuto 47. Despois, no 53, Guerrero asistía a Kevin para que fixese o segundo. E, no 58, o propo Guerrero asinaba o 3-0. No medio, outra clarísima ocasión cun remate de Fabi que quedou morto, con dous defensas no chan, e que Guerrero non podía aproveitar. O encontro quedaba sentenciado.

Nos últimos minutos, o ritmo baixou, sobre todo por parte do filial. Aínda así, tivo unha gran ocasión que Bil acabou estrelando no pau. No tempoo engadido tamén puido marcar o Laredo o gol da honra, pero topou con Alberto. Vitoria do Fabril en Abegondo.