O fume dos incendios do Canadá chega a Galicia tras percorrer miles de quilómetros
O fume dos incendios do Canadá chega a Galicia tras percorrer miles de quilómetros
A presenza do fume xera unha redución lixeira da visibilidade, pero non afecta a calidade do aire
O fume dos incendios do Canadá chegou a Galicia tras percorrer miles de quilómetros nas capas altas da atmosfera, aínda que só xera unha redución lixeira da visibilidade sen afectar á calidade do aire, segundo Carlos Otero, meteorólogo de Meteogalicia.
O experto en meteoroloxía sinalou que os incendios "moi intensos", como os que afectan O Canadá, son "capaces de elevar o fume a niveis altos da atmosfera" e, nesas capas, unha corrente de aire en altura, o 'jet stream', é capaz de "trasladar" esa nube miles de quilómetros.
Entre o Canadá e Galicia hai máis de 5.000 quilómetros, unha distancia que lograron completar as partículas procedentes dos incendios canadenses.
O modelo CAMS, que proporciona predicións de calidade do aire sobre Europa, reflicte a chegada á Península Ibérica desas partículas que son "moi finas e mantéñense en suspensión moito tempo", afirma Otero.
Este domingo comezou a detectarse o fume dos incendios, este luns será o día de maior concentración e tamén parte do martes, segundo Meteogalicia.
"Provoca unha redución lixeira de visibilidade, a sensación de ambiente turbio, como de calixe, pero non hai po sahariano senón concentración de fume", indica o meteorólogo.
As mellores horas para observar este fenómeno son as primeiras da mañá ou á noitiña.
Engade que "a nivel superficial non se detectan cambios na calidade do aire" e precisa que "se irá diluíndo e dispersando na atmosfera".
A concentración no resto de España será menor que en Galicia, o mércores apenas se percibirá e o xoves está prevista a entrada dunha fronte que limpará o ambiente.
A pesar de que o tachan de "anécdota", desde Meteogalicia puxeron en valor a tecnoloxía actual, que permite visualizar onde se atopan estes fumes e o percorrido que previsiblemente farán.
Precisamente o observador europeo Copernicus mostra que esta nube de fume manterase no ceo do norte de España durante polo menos dous días máis, pero irá esvaecéndose co paso das xornadas.
