O futuro da globalización, a debate na Toxa
O futuro da globalización, a debate na Toxa
Analizan a emerxencia de novos actores e novos retos nas relacións económicas mundiais
Pese ás incertezas, ningún dos expertos teme unha volta ao proteccionismo
Como nos movemos no medio da néboa? Con esta pregunta, Antón Costas invitaba a deliberar sobre as incertezas que a aparición de novos actores, como A China, e novos retos, como o cambio climático, introducen na globalización.
O economista galego non cre que vaia traer consigo unha volta ao proteccionismo. "O que si que creo é que hai un cambio importante nesta nova era, unha busca de reequilibrios diferentes en relación con aqueles equilibrios que mantivemos nos últimos 30 anos", dixo Costas.
Dani Rodrik, un dos maiores expertos mundiais na globalización, non vaticina un retorno á política de bloques da Guerra Fría e quítalles importancia ás tácticas proteccionistas tanto da China como dos Estados Unidos.
"As políticas proteccionistas non son a principal ameaza á economía mundial. Son, de feito, precondicións para ter unha economía mundial sa. A auténtica ameaza son os riscos de xestionar mal a competencia xeopolítica", sostén o Premio Príncipe de Asturias e profesor de Harvard.
Europa, a economía máis aberta do mundo, tamén se prepara para a nova era, trocando dependencia por autonomía.
Pablo Hernández de Cos, gobernador do Banco de España, explica: "Estase poñendo moita máis énfase na diversificación, para eliminar dependencias, e tanto empresas como gobernos están poñendo máis énfase na seguridade que na eficiencia".
A redución da pobreza como nunca antes na historia é para os tres o gran legado da globalización, un éxito que non ven en perigo a pesar das incertezas.
