O material recollido no Algarve na busca de Madeleine McCann analizarase en Alemaña

O operativo realizado no Algarve pola policía portuguesa, xunto a efectivos alemáns e británicos, finalizou despois de tres días de procuras co recollida de material que será analizado en Alemaña.

Os medios despregados no encoro de Arade, a uns 50 quilómetros de onde desapareceu a nena británica hai 16 anos e unha paraxe frecuentada polo principal sospeitoso, o alemán Christian Brueckner, empezaron a retirarse do terreo na tarde deste xoves.

A Polícia Judiciária (PJ) explicou nun comunicado que durante a procura recolleuse "algún material" que será entregado ás autoridades alemás para que sexa analizado e asegurou que foron "salvagardados" os intereses da investigación aínda en curso en Portugal.

As operacións desenvolvéronse durante tres días, unha xornada máis do previsto, despois de que as autoridades decidisen prolongar a procura porque o temporal de choiva obrigou a suspender os traballos o martes.

A procura apoiouse en maquinaria pesada, cans, xeorradares e drons e recompilouse material almacenado en bolsas para a súa análise.

Nas últimas horas, a investigación centrouse nunha área moi acoutada das beiras do encoro, onde foron cortadas árbores para escavar no terreo.

Tras a retirada do operativo levantouse o cordón policial que impedía acceder a zona de procuras e puidéronse ver os efectos das escavacións realizadas pola policía na zona, con grandes montóns de terra, rocas partidas, maleza arrincada e marcas do uso de maquinaria pesada nunha área acoutada a poucos metros da beira do encoro.

A presa de Arade era un lugar frecuentado por Brueckner, que pasaba longos períodos coa súa autocaravana na zona.

A pista dun informador, segundo medios locais, levou as autoridades alemás a solicitar traballos de procura no encoro.

A zona xa foi rastrexada en 2008 por investigadores privados sen éxito, pero expertos en medicina forense coinciden en que os avances tecnolóxicos dos últimos anos poderían ser fundamentais para resolver o caso se finalmente atopasen evidencias sobre a desaparición da nena.

Madeleine tiña tres anos cando desapareceu -o 3 de maio de 2007- do cuarto onde durmía cos seus irmáns pequenos nun complexo turístico de Praia da Luz.

Tras anos de investigación, o caso deu un xiro en 2020 e o alemán Christian Brueckner, preso no seu país por outros delitos, converteuse en principal sospeitoso.

A Fiscalía alemá de Braunschweig traballa coa teoría de que Madeleine morreu a mans de Brueckner, que conta cun amplo historial de crimes por abusos sexuais e pederastia, algúns deles en Portugal.