O Ministerio de Transportes informa o xuíz que ten prohibido dar instrucións sobre a inspección que se faga no Villa de Pitanxo

O Ministerio de Transportes trasladou ao xuíz que a Administración ten "prohibido legalmente" dar "calquera instrución" sobre a inspección que se practique no Villa de Pitanxo.

O departamento ministerial remitiu á Audiencia Nacional "toda a información" que solicitaba en canto á misión emprendida polo buque Ártabro para inspeccionar o Villa de Pitanxo, que naufragou a 450 quilómetros de Terra Nova (O Canadá) en febreiro de 2022.

Así o trasladan fontes do Goberno central, que con todo alegan que "non lle corresponde" ao Mitma nin "a execución do contrato" nin "a coordinación" co xulgado, senón que é a Comisión Permanente de Investigación de Accidentes e Incidentes Marítimos (CIAIM) a que o debe facer como órgano que goza de "independencia".

O Ártabro partiu o pasado 17 de maio do porto de Vigo a pesar de non contar co permiso do xuíz Ismael Moreno, que investiga este naufraxio en que faleceron 21 dos 24 mariñeiros que ían a bordo, nin co "visto e prace" das familias das vítimas.

Este luns, o maxistrado emitiu unha providencia para pedir explicacións ao Goberno central sobre por que partiu o barco sen "expresa autorización".

Este martes, fontes do Executivo confirman que, ademais de trasladar á CIAIM os requirimentos do xuíz, xa se remitiu "toda a información solicitada" porque, "como non podía ser doutra forma", o Ministerio de Transportes ten "total disposición á colaboración máxima coa xustiza".

Neste contexto, o Goberno lembra que si corresponde ao Mitma "poñer os medios, económicos e materiais, e realizar a tramitación administrativa" para contratar o operativo, cuestións que foron remitidas ao xulgado correspondente da Audiencia Nacional.

Con todo, advirte que "tanto a elaboración dos pregos como a xestión da execución do contrato e a coordinación" co xulgado "non lle corresponde" ao Ministerio, que "debe manterse á marxe pola propia independencia" que ten a Ciaim nas súas actuacións, tal e como lembran estas fontes.

Ademais, insisten en que esta Comisión, aínda que está adscrita organicamente ao Mitma por "carecer de personalidade xurídica propia", ten "plena autonomía funcional" na súa investigación. De feito, Transportes trasladou ao xuíz que "está prohibido legalmente", de acordo co dereito comunitario e os tratados internacionais, que as autoridades administrativas poidan darlle "calquera instrución" á CIAIM.