Abre na Coruña o primeiro centro de ocio de realidade virtual en Galicia

Só hai 140 locais de ocio de realidade virtual en todo o mundo e agora chega o primeiro a Galicia. O centro Zero Latency será un oasis para todos os amantes dos videoxogos ávidos de experiencias inmersivas.

"Aquí a xente vai poder ter experiencias inmersivas xogando e despois facerse vídeos cos personaxes favoritos. É un centro moi moderno, moi futurista", explica Juan Sanjuan, ceo de Nunegal Consulting.

O centro conta con cabinas holográficas e cunha sala de xogos de 200 metros cadrados equipada coa tecnoloxía máis punteira que hoxe testou un grupo de gamers galegos.

"Nótase bastante inmersivo é o certo é que ata dá medo, nalgunhas ocasións".

"Sobre todo cando che veñen aí superpreto, de feito hai un momento en que me puxen a berrar un montón pero encantoume, superguai".

 "Por momentos nin te decatas que estás nun espazo físico real. Pásanche animais, paxaros, todo", contan os gamers que participaron na estrea.

Tras o rexistro e un adestramento previo, toca enfundarse o casco e a xogar durante 30 minutos.

"Hai unhas experiencias para xente máis pequena onde non se precisan armas e logo hai experiencias de zombis, aliens. Agora estreamos Warhammer: Space Marine que sae o lanzamento a nivel mundial aquí con Zero Latency pero hai xogos famosos como Far Cry e outros que coñece todo o mundo", apunta Juan Sanjuan.