O Papa na súa reaparición no Domingo de Ramos: "Ninguén pode ser marxinado"

O papa Francisco presidiu a misa do Domingo de Ramos, un día despois de saír do hospital por unha bronquite, e na súa homilía defendeu os "abandonados" do mundo: "Ninguén pode ser marxinado", dixo ante milleiros de fieis e coa voz aínda débil durante esta eucaristía que inicia a Semana Santa.

"Xesús abandonado pídenos que teñamos ollos e corazón para os abandonados. Para nós, discípulos do Abandonado, ninguén pode ser marxinado; ninguén pode ser abandonado á súa sorte", animou ante unha praza de San Pedro engalanada e abarrotada.

Lembrou un mendigo morto na columnata vaticana "só e abandonado" e que -dixo- representa a Cristo.

"Moitos necesitan a nosa proximidade, moitos abandonados, tamén eu necesito que Xesús me dea agarimo, que estea preto de min, e por iso vouno buscar nos abandonados e nos solitarios", explicou.

Na súa primeira reaparición pública despois de tres días ingresado por unha bronquite, aos seus 86 anos, Francisco, cuberto por un longo abrigo branco, meditou sobre as palabras de Xesús de Nazaret na Cruz: "Meu Deus, meu Deus por que me abandonaches?".

Explicou que "o verbo 'abandonar' na Biblia é forte" e "aparece en momentos de extrema dor", e por iso o recordo de Cristo debe mover os seus seguidores a "buscalo e amalo nos abandonados" do noso tempo.

"Hoxe hai tantos 'cristos abandonados'. Pobos enteiros explotados e abandonados á súa sorte; pobres que viven nas esquinas das nosas rúas, con quen non nos atrevemos a cruzar a mirada; emigrantes que xa non son rostros senón números; presos rexeitados, persoas catalogadas como problemas", lamentou, elevando o ton de voz.

Pero, sostivo, tamén hai moitos "cristos descartados con luva branca" como "nenos non nados, anciáns que foron deixados sós, nos xeriátricos, enfermos non visitados, discapacitados ignorados, mozos que senten un gran baleiro interior sen que ninguén escoite realmente o seu berro de dor".

Francisco, aínda convalecente, reapareceu na praza de San Pedro ante uns 30.000 fieis. Antes da misa, levárono sobre un coche sen capota ata o centro da praza, aos pés do obelisco, para bendicir as ramas de oliveira e as palmas que os fieis, as relixiosas e os membros da Curia portaran en procesión, lembrando a entrada triunfal de Xesús de Nazaret en Xerusalén.

Baixou do coche polo seu propio pé e despois percorreu uns poucos metros ata o lugar disposto para a bendición axudado do bastón que usa frecuentemente debido aos seus problemas de xeonllo.

O Papa acudiu despois ata o frontal da basílica, sempre en coche e coa súa propia palma, para presidir desde aí a misa, que foi oficiada por un cardeal, o arxentino Leonardo Sandri, unha fórmula que se repetirá en toda a Semana Santa.