O Supremo absolve de prisión a dona dun bar da Coruña que pirateou partidos de fútbol

O Tribunal Supremo absolveu da pena de seis meses de prisión a dona dun bar da Coruña por piratear dous partidos da liga de fútbol de Primeira División en 2018 e tamén lle reduciu a multa de 2.700 a 540 euros.

Os partidos foron retransmitidos o 3 de novembro e o 11 de decembro de 2018. En ambas as ocasións, a xerente ofreceu á súa clientela senllos encontros "sen autorización" e "accedendo@gratuitamente á canle La Liga de forma inconsentida mediante un decodificador pirata".

A sentenza explica que a Liga Nacional de Fútbol Profesional é a única cesionaria da comercialización dos dereitos audiovisuais de primeira e segunda división e da Copa do Rei, así como ten atribuídas as funcións de produción e realización.

Por iso, os establecementos de hostalería, para poder exhibir estes partidos de fútbol, "deben ter contratado cun operador autorizado a canle La liga TV".

O Xulgado do Penal número 5 da Coruña condenou a dona do bar a seis meses de prisión e a 2.700 euros de multa por un delito contra o mercado e os consumidores e outro delito contra a propiedade intelectual, ademais do pago dunha indemnización de 431,45 euros á Liga polos prexuízos causados, un fallo que ratificou a Audiencia Provincial da Coruña.

Pero agora o Supremo absólvea do delito contra a propiedade intelectual, ao lembrar que a doutrina, fixada polo pleno da Sala do Penal o 2 de xuño de 2022, determina que os bares que piratean a retransmisión de fútbol incorren nun delito ao mercado castigado con multa, pero non contra a propiedade intelectual, que implica prisión, porque o fútbol non é unha "obra ou prestación literaria, artística ou científica", como esixe o Código penal.

"O fútbol, desde logo, non é literatura. Tampouco é ciencia. É certo que nun partido de fútbol poden sucederse lances de innegable valor estético, pero interpretar eses momentos ou secuencias de perfección técnica como notas definitorias dun espectáculo artístico pode conducir a transgredir os límites do principio de tipicidade", sinala a doutrina citada. 

Desta forma, absólvea da pena de seis meses de prisión e reduce a multa a 540 euros só por un delito contra o mercado, en atención a "a mínima entidade do feito e do quebranto económico causado, así como a inexistencia de circunstancias persoais na acusada que aconsellen a imposición dunha pena superior".