Os combustibles soben durante cinco semanas consecutivas e chegan a prezos de hai un ano

Esta operación saída vai ser cara: os prezos dos combustibles están xa como o verán pasado, cando aínda estaba vixente o desconto de 20 céntimos por litro de carburante.

Na última semana, o litro de gasolina vendeuse de media a 1,68 o litro, fronte aos 1,66 que se pagaban hai un ano, unha vez aplicado ese desconto. No caso do gasóleo, na última semana subiu ata os 1,55 euros o litro, cando o ano pasado por estas datas estaba a 1,65.

É a quinta semana consecutiva de subas, e os combustibles alcanzan prezos que non viamos desde mediados de 2022, en plena crise enerxética pola invasión de Ucraína. 

Os carburantes non deixan de subir semana a semana e no caso da gasolina acada un prezo moi similar ao do ano pasado por esta época, cando se aplicaba a bonificación de 20 céntimos por litro aprobada polo Goberno. Daquela pesaba moito o contexto da crise enerxética pola guerra de Ucraína e por iso todos os condutores non entenden o incremento deste ano.

Segundo os datos do Boletín petroleiro da Unión Europea, o litro de gasolina atópase de media en 1,68 euros, mentres que o de gasóleo custa 1,55 euros. Os turistas critican esta suba por ser habitual cando comezan as operacións saída das vacacións.

A pesar deste escenario de encarecemento do cru, os carburantes en España volveron estar por debaixo da media dos 27 países da Unión Europea, onde o prezo se situou arredor do 1,80 euros o litro de gasolina e de 1,68 euros o do gasóleo.