Os deputados electos do PSdeG participan na súa primeira reunión no Parlamento

Os deputados electos do PSdeG participaron este luns, día 4 de marzo, na súa primeira reunión interna na cámara galega tras as eleccións autonómicas do pasado 18 de febreiro.

Segundo informaron fontes socialistas, os candidatos do PSdeG elixidos nos pasados comicios asistiron a un encontro no que varios deputados saíntes e o que era portavoz parlamentario, Luis Álvarez, informáronos sobre distintos asuntos relativos ao labor parlamentario.

Así, polo Pazo do Hórreo ademais do propio Álvarez, puido verse este luns os que foron parlamentarios na última lexislatura, Julio Torrado, Leticia Gallego e Patricia Otero.

Esta última, que concorreu como número dous do PSOE ao Congreso pola provincia de Lugo, prevese que tome posesión como parlamentaria na Cámara baixa tras a saída do candidato á Xunta, José Ramón Gómez Besteiro, para centrarse no seu labor no Parlamento de Galicia.

E é que no grupo parlamentario socialista só repiten dúas deputadas da anterior lexislatura. Trátase de Carmen Rodríguez Dacosta, que encabezou a lista por Ourense, e de Paloma Castro, que ocupou o número tres na candidatura por Pontevedra.

A única parlamentaria electora que non participou no encontro foi a exalcaldesa de Lugo e número dous pola provincia, Lara Méndez, quen non puido asistir por atoparse enferma.

Pola Coruña, foron elixidos Patricia Iglesias, Julio Abalde e Silvia Longuera. Por Lugo serán deputados José Ramón Gómez Besteiro e Lara Méndez. 

Por Pontevedra os candidatos electos son Elena Espinosa, Carlos López Font e Paloma Castro; mentres que por Ourense é Rodríguez Dacosta.

Ademais, fontes socialistas apuntaron que este martes José Ramón Gómez Besteiro e o secretario xeral do PSdeG, Valentín González Formoso, desprazaranse á localidade portuguesa de Braga. Alí participarán nun acto electoral dos socialistas portugueses, cuxa candidatura encabeza Nuno Santos, con motivo da campaña ás eleccións xerais que terán lugar o próximo 10 de marzo.