Sánchez di que falará claro sobre a amnistía cando sexa candidato á presidencia
Sánchez di que falará claro sobre a amnistía cando sexa candidato á presidencia
Oriol Junqueras asegura que o PSOE xa pactou a amnistía en agosto, algo que negan desde o Goberno en funcións
Pedro Sánchez tamén asegurou que non prevé unha repetición electoral
Pedro Sánchez asegura que non prevé unha repetición electoral e que todos os seus plans pasan por reeditar un Goberno progresista.
O presidente do Goberno en funcións fixo estas declaracións nunha conversa informal cos xornalistas en Nova York. Onde asegurou ademais que falará claro sobre a amnistía e sobre as esixencias dos independentistas unha vez que reciba o encargo do rei de intentar a investidura.
Así se manifestou tras as declaracións esta mañá do líder de ERC, Oriol Junqueras, que deu por feito que o PSOE xa asumiu a amnistía desde hai un mes.
"Forma parte xa do acordo ao que chegamos co PSOE para a constitución da Mesa do Congreso. Naquel acordo xa se dicía que se acabaría coa represión por todos os medios legais", dixo Junqueras.
Fontes socialistas desménteno. E varios ministros din descoñecer un acordo neses termos.
Miquel Iceta Ministro de Cultura e Deporte en funcións, di: "Descoñezo ese acordo e, se existe e se asinou, debe ser público e coñecido".
Pilar Llop Ministra de Xustiza en funcións, di: "Eu non vin ningún documento e non vou falar de conxecturas".
Desde o Goberno apelan á discreción e remiten á Constitución como marco para calquera negociación cos independentistas.
"Hai unha garantía para todo este tipo de declaracións, e é que a Constitución cúmprese en todo o territorio", di a portavoz, Isabel Rodríguez.
O PSOE insiste en que non dará ningún paso ata que fracase a investidura de Feijóo. O candidato popular segue coa rolda de contactos e este martes reuniuse co secretario xeral da UXT.
