Piden 6 anos de cárcere para a presidenta do Parlament por adxudicar contratos a dedo

A fiscalía pide seis anos de cárcere, 21 de inhabilitación e multa de 146.000 euros para a presidenta do Parlament, Laura Borràs, por adxudicar presuntamente a dedo a un amigo 18 contratos menores entre marzo de 2013 e febreiro de 2017, cando dirixía a Institució de lles Lletres Catalanes.

No seu escrito, a fiscalía acusa a Borràs, presidenta de JxCat, dos delitos de prevaricación e falsidade en documento mercantil por fraccionar contratos da ILC para poder adxudicarllos ao seu amigo Isaías H. sen concurso público.

Pola contra, o ministerio público excúlpaa dos delitos de fraude e malversación de fondos públicos polos que a procesou o TSXC, que poderían disparar as penas de prisión.

O escrito de acusación solicita a mesma pena de Borràs para Isaías H., a quen a presidenta do Parlament coñecía pola súa relación profesional previa na Universidade de Barcelona -era profesor dun máster e un posgrao que ela dirixía- e porque ambos formaban parte dun grupo de investigación en estudos literarios e tecnoloxía dixital.

En cambio, pide o sobresemento para Roger E., traballador da ILC, que estaba investigado por facilitar as irregularidades na contratación e que hai unhas semanas  se abriu a colaborar coa acusación entregando ao TSXC uns audios de Whatsapp e un informe da Intervención Xeral incriminatorios para Borràs.

Borrás di que é inocente e non vai dimitir

A presidenta do Parlament, Laura Borràs, afirma que sente vítima dunha "persecución política", que é inocente dos delitos que se lle acusan e que non dimitirá do seu cargo á fronte da cámara catalá.

"Non cometín nunca, díxeno, ningún delito, e penso loitar ata a extenuación para defender a miña inocencia", afirmou a presidenta do Parlament.

Borràs engadiu que a "desproporción" das penas explica, ao seu xuízo, porque se trata dun caso de "persecución política".